Sharapova leh Nishikori inhnukdawk

Kumina Grand Slam hnuhnung ber tur US Open a hnai tawh a, inbuatsaihnain a vawrtawp a thleng chho mek. Tun kar chhung hian Cincinnati Open khelh a ni leh dawn a, hmeichhe player langsar tura ngaih Maria Sharapova leh Japan tlangval Kei Nishikori te erawh hliam vangin an inhnukdawk.

Kum 30 mi Sharapova hian New York-a inlan turin wildcard a hmu a, mahse a ban vei lam na vangin a inkhel thei dawn lo. Russian nula hi thlatir lam khan West Classic aṭangin a lo inhnukdawk tawh bawk.

Mipa lamah kum 27 mi Nishikori pawh a banrek dinglam na vangin a khel thei dawn lo. Tun dinhmunah mipa player langsar an hliam nasa hle, world number 1 Andy Murray, champion lai Marin Cilic, U.S. Open champion lai Stan Wawrinka leh Grand Slam vawi 12 champion tawh Novak Djokovic te chu hliam vangin an chawl mek vek a ni.

World number 8 Nishikori chuan, "Pathianni khan traning kan neihna lamah ka ban ka ti na a, endik a nih hnuah chawlh ka mamawh thu min hrilh. Cincinnati Open hi hard court tournament lian leh nuam tak a ni a, ka khel thei lo tur hi pawi ka ti takzet," tiin a sawi.

Tennis inelna zinga lawmman sum fai tamna ber US Open hi August 28 aṭanga September 10 chhungin New York-ah khelh a ni dawn a, tuna player langsar inhliam zingah Djokovic leh Wawrinka tih loh hi chu inlan hman tura ngaih an ni.