Svitolina kutah nomawi pangana

Elina Svitolina chuan Caroline Wozniacki hnehin Rogers Cup champion a ni. Ukraine nula Svitolina hian kuminah nomawi panga a chawina chiah a ni a, chak lo zawk Wozniacki erawh final ṭum ruk a khelhah a chak lo zawkah a ṭang ziah thung.

Pathianni zana hmeichhe final khelhah seeded pangana Svitolina hian darkar khat leh minute 17 chhungin 6-4, 6-0 in hnehna a chang. US Open inbuatsaihna tur pakhat Cincinnati Open-ah a champion leh thei a nih chuan world number 1 dinhmun a luah thei dawn a ni, tun hnaiah hmeichhe player cheṭha fal an tam loh avangin ranking a inthlak danglam nasa thei hle.

Kum 22 mi Svitolina hian nomawi chawi tur hian player langsar tak tak a hneh. Grand Slam vawi sarih champion tawh Venus Williams, Wimbledon champion hlim Garbine Muguruza leh Rogers Cup nomawi kawltu Simona Halep te a hneh vek. Kuminah final vawi nga khel tawhin hnehna a chang fai vek bawk.