Goal nen Neymar a inlar nghal

Pathianni zan khan khawvela footballer manto ber Neymar-a'n Paris St-Germain tana a match hmasa ber a khel a, pound maktaduai 200 man Neymar hian Guingamp lakah goal khat a khung bakah Edinson Cavani khung tur a siamsak bawk a, a club thar hi si thum faiin hnehna a chanpui.

Stade du Roudourou-a inkhelah PSG hian ṭan tirh aṭanga a tawp thlengin inkhel an thunun a, season hmasa Ligue 1 top scorer Cavani leh Barcelona forward hlui Neymar ten goal an khung bakah Guingamp defender Jordan Ikoko chuan an lamah a ti lut palh bawk.

Brazil captain Neymar-a'n inkhel bul a ṭan a, striker Cavani a awm avangin khemual sir lamah hun a hmang. A ball thiamna hmangin an khingpui trahnung vawi tam tak a chhaih mangang a, Cavani goal khung tur a siamsak hnuah Uruguay international cross chu minute 82-naah hnai set sawt aṭangin a khung ve thung.

Neymar hian goal khung tuma vawi ruk a petah ṭum khat a hlawhtling a, passing accuracy 76% neiin Cavani 91% leh Angel Di Maria 86% te chiah a tluk lo. Khelmuala a awm chungin ball vawi 128 a khawih a, European league game a khelh tawh zawng zawngah ball a khawih hnem ber dawt ṭum a ni.

Kum 25 mi Neymar chuan, "Kan zavaiin kan khelṭha a, goal ka khung bawk avangin lawmna tur hlir a ni. Guingamp laka kan khelh anga kan khel zel thei a nih chuan beiseina pawh a sang hle," a ti.

Catalan club a chhuahsan chungchang sawizuiin Neymar chuan, "Mi tam tak chuan Barca chhuahsan kha thihna ang hialah an ngai a, mahse a ni ngawt bik lo. Helai hmunah hian football tho kan khel a, player ṭha leh ropui tak tak he hmunah pawh hian an awm ve tho a ni," tiin beiseina a neih thu a sawi.

Juventus aṭanga PSG zawmtu defender Dani Alves chuan Brazil tana a khelhpui Neymar chungchang sawiin, "Player dangte hian a match hmasa bera goal a khung theih nan puih kan duh vek. Amahah hian beiseina kan nei sang hle a, kan beisei ang ngeiin a ti hlawhtling bawk. He team-ah hian danglamna thlen turin a rawn kal a, nakinah pawh a mawhphurhna a hlen chhoh zel theih ka beisei," tiin a sawi.

Falcao hattrick

French Ligue 1 inkhel dangah champion lai AS Monaco tan striker Radamel Falcao chuan hattrick siamin Dijon lakah 4-1 in an chak a, league match hnih an khelh tawhah an chak ve ve a, point ruk an hmu. An nomawi kawl lai humhim turin season bul an ṭan fuh hle.

Colombia international Falcao-a'n goal thum a khung ṭum hian an league match hmasa zawka Toulouse an hneh ṭuma hliam tenau tuar Kylian Mbappe chu bench-ah ṭhut tluantir a ni thung. France rawlthar hi tun hnaiah PSG nen sawi zawm a ni leh a, nipui transfer bazar tawp hma chu a chanchin hian sawi zui a hlawh dawn niin a lang.

Monaco boss Leonardo Jardim chuan, "Mbappe kan chawlhtir kha club thutlukna a ni a, harsatna tawk loa hnehna kan chan avangin player dang tan inkhelhna hun ṭha a ni ve bawk. Kan hma lawkah Champions League khelh tur a awm chho dawn a, player tinin tawnhriat an lo neih lawk hi a ngai a ni," a ti.

Kumin French Ligue 1 match hnih an khelh tawh aṭangin Monaco, PSG, Olympique de Marseille, Saint-Etienne leh Lyon ten point ruk ṭheuh an hmu tawh.

Kar tawp Inkhel Results
Strasbourg 3 - 0 Lille
Dijon 1 - 4 Monaco
Guingamp 0 - 3 PSG
Nantes 0 - 1 Marseille
Amiens SC 0 - 2 Angers SCO
Bordeaux 2 - 0 Metz
Caen 0 - 1 Saint-Etienne
Toulouse 1 - 0 Montpellier