T20 Cricket World Cup khelh hun sawn

Kumin kum tawp lama Australia-a neih tur T20 Cricket World Cup chu coronavirus vangin nakkumah sawn a ni.

T20 World Cup hi kumin 18 October leh 15 November inkar hian neih tur a ni a, Covid-19 vanga a khelh theih tak loah chuan October leh November 2021-ah neih a ni ang a, kum 2022-ah khelh a ni leh bawk ang. International Cricket Council (ICC) chief executive Manu Sawhney chuan, "T20 World Cup hlawhtling leh him taka khelh a nih theih nan sawn hi thutlukna ṭha ber a ni. Inelna hun sawn a nih takah chuan cricket khel ram ten Covid-19 vanga inelna an neih theih lohte khelhna hun atan an hmang thei ang," tiin a sawi.

Ruahmanna hmasaah chuan kum 2020-a inelna neih tur hi Australia-a khelh tur a ni a, 2021 T20 World Cup hi India ramah neih tur a ni thung. ICC hian ruahmanna thara inelna thlengtu tur a la tichiang lo a, India nge Australia-in inelna thleng hmasa dawn tih hriat a la ni lo. ICC hian kum 2023-a Cricket World Cup (ODI) khelh hun tur pawh a sawn tlai hret a, February leh March thlaa neih tura ruahman chu October leh November thlaa neih turin a sawn a ni.

T20 Cricket World Cup

West Indies    Champion - 2012, 2016

Sri Lanka    Champion - 2014

India    Champion - 2007

Pakistan    Champion - 2009

England    Champion - 2010

Australia    Runner up - 2010

South Africa    Semifinal - 2009,2014

New Zealand    Semi-inal - 2007,2016