Hammers lakah Man United fiahna

Manchester United-in zanin dar 10:30 hian Old Trafford-ah West Ham United an mikhual dawn. Ole Gunnars Solskjaer chuan, "Cup-a chak loh hi khawvel tawpna a la ni lo," tiin FA Cup semifinal-ah Chelsea hneh lo mah se beisei tur dang a la awm thu a sawi. United hian season thara Champions League khelh an la beisei a, an tum ram thleng turin Hammers hneh ngei a ṭul.

United khingpui tur Hammers hi chhiarkawp danin Premier League khel zel turin an la him lo a, David Moyes chuan, "Kan hna a la zo," a tih avangin a club hlui duhsak a tum lo. Hammers hian an match hnuhnung pahnihah Watford (3-1) leh Norwich City (4-0) an sawp a, an tawrhhlelh awm khawp ang.

Manchester United hi Jan-uary 22-a Burnley laka an tlawm hnuah league-ah hneh loh an tawng tawh lo a, thlasik bazara an lakluh Bruno Fernandes leh Odion Ighalo te nen an phur thar hle. Covid-19 buaina hnuah Marcus Rashford leh Paul Pogba te an dam a, goal khung an uar avangin United an hawi sang hle.

Amaherawhchu hun pawi-mawhah United an chesual a, Southampton hneh se pathumna dinhmun luah thei tur kha an inhnehtawk avangin tun season-a hun tam zawk an awmna panganaah an la awm zui zel. Solskjaer naute chunga rinhlelhna belhchhah turin Chelsea lakah 3-1 zetin FA Cup semifinal-ah an mualpho.

Norwegian manager hian FA Cup-ah rawng huai a ser lo a, Hammers nen erawh an ṭhat dan ber a hmang tawh ang. Solskjaer chuan, "Tuna kan inkhel tur chiah ka ngaihtuah," tiin hnehna chang chunga fiahna paltlang a tum thu a sawi.

Chelsea laka mualpho David de Gea chanchinin ngaihven a hlawh. Solsjkaer chuan, "Kan ṭan ho tlat a ngai. David hi a rilru a huaisen a, a hna a hrechiang. Training-naa theihtawp chhuah a, match khel tura inpeih chu a tih tur a ni," tiin a sawi a, Spanish keeper-in United goal a veng dawn.

De Gea ang emin sel lo mah se Harry Maguire pawh Chelsea lakah a mualpho a, Victor Lindelof  lah Blues-in goal hmahruai an khungna tura mawhphurtu a ni. Hammers hmachhawn turin Maguire a dam a, Lindelof pawh a inpeih a, hliam vanga first half-a thlak Eric Bailly erawh inhliam na lo mah se a dinhmun a chiang lo.

Chutihrualin United tlarhnung hi Hammers tlarhma laka rin an har hle. West Ham forward Michail Antonio-a'n Covid-19 hnuah goal sarih ngawt a khung tawh a, Czech midfielder Tomas Soucek lah David Moyes-a'n Marouane Fellaini ang maia a hman thiam a ni a, Old Trafford-ah an inthlahrung lo ang.

United tana chanchin lawmawm erawh Chelsea nen an player ṭha ṭhenkhat an hahchawlhtir avangin West Ham nen ṭan phat aṭangin an ṭhat theih dan berin an inlan thei dawn. Hei chauh hi a ni lo a, nizan inkhela Aston Villa-in Arsenal an hneh a nih loh chuan West Ham hi an him dawn a, khelh an awl sawt ang.