Chhinga Veng - Nuam Nuam Nuam
Lalsangzuala Hmar-in Great Sports Independence Day Football nomawi a chawi ta. Nimin final hmuhnawm takah MFA Super Cup champion Chhingcows-in Mizoram Premier League champion Chanmari FC 2-1 in an hneh.
Lammuala inkhel hmuhnawm takah Chanmari FC-in Jakob Vanlalhlimpuia hmangin goal khung mah se, Chhinga Vengin substitute Lalrammuanpuia hmangin an sut a, extra time-ah MS Dawngliana'n Chhingcows chakna goal a khung.
Chhinga Vengin nomawi duhin coach Sanga leh player ṭha an lalut a, MPL ṭan hmaa nomawi chawi theih pahnih MFA Super Cup leh I Day Football-ah an la ta. An hmabak chu Mizoram chhunga inelna ngaihhlut ber Mizoram Premier League-a champion a ni.
Rawlthar Jakob
Chhinga Veng FC-in nung takin bul ṭan mah se Chanmari FC-in goal an khung hmasa zawk. H. Vanlalthlanga hoten an goal nawr hmasakah goal an khung nghal.
Minute hnihna lekah Lalmuanzova'n dinglam aṭangin ṭha zetin a lalut a, Chhinga Veng defender an muthlu. Kanhmun tlangval Muanzova'n box chhunga awm Jakob-a zawnah chiah ball pein Hnahthial rawlthar hian goal hmahruai a khung.
Chhinga Vengin minute nga hnuah Laldampuia hmangin si phurh sut theihna hun ṭha an nei a, Dampuia'n hun ṭha bik hi engmah loah a chhuah.
Chhingcows-in Chanmari tlarhnung an ṭhiat thei lo a, Sawmfela leh Dawngtea ten ṭum dang an pha lo. Dampuia'n chance ṭha a hlah hnuah first half-ah goal chance ṭha hmuh tur a awm tawh lo.
A suttu Apuia
Chhinga Veng coach Lalsangzuala Hmar-in an goal nawr a na tawk lo tih hriain Laldingngheta aiah season liam taa Bethlehem Vengthlang FC tana goal khung tam ber Lalrammuanpuia (Apuia) a rawn luhtir.
Minute 56-naah ball pet thiam R. Malsawmtluanga corner pet chu Armed Veng South tlangval Apuia'n a tauh goal a, 1-1 a ni.
Final ṭan hmaa thawm nei lian zawk Chhinga Veng FC chu chakna goal khung tura rinawm zawk ni mah se an chungnung chhunzawm lo. Chanmari FC winger Lalmuanzova'n a tlan chakna hmangin Chhingcows tlarhnung a tibuai a, goal erawh a keng tel lo.
Minute 90 chhungin 1-1 a ni.
Tawnhriat ngah zawk
Extra time-ah tawnhriat ngah zawk leh puitling zawk Chhinga Veng an danglam. Minute 101-naah hun pangngaia khel ṭha Chanmari FC defender Rosanga a chesual a, Chhingcows striker Sawmfela a intlan lehpelhtir avangin goal an chhuah.
Tun inelnaa goal ruk khung tawhtu Sawmfela hian mahni hma sial lo takin vengtu nei lo Dawngtea a pe a, Bawngkawn tlangval hian harsatna nei loin goal pawimawh a khung.
Chanmari FC-in huaisen takin an nawr let a, amaherawhchu goal dang a lut tawh lo. Coach Thlanga hote Chhingcows nena an intawn hmasak ṭum aiin nasa takin insiamṭha mah se nomawi chawina tur khawpin a ṭha tawk lo.
Sanga a lawm
Chhinga Veng coach Sanga'n I Day Football nomawi chu a lak châk ber a nih thu a sawi tawh a, tunah chuan a la ta. Sanga chuan, "Ka career-a ka ngaihhlut ber a ni a, ka tum ka tihlawhtling. Kan team kan inlungrual a, kan hlawhtlinna hi kan vai thawhrah a ni," tiin Vanglaini a hrilh.
Sanga chuan, "Min sponsor-tu JSJ Fitpro leh NECS-te chungah kan lawm takzet a, club hruaituten min duat a, ka duh ang player min laksak. Anni bakah hian min ṭantu Chhinga Veng mipuite pawh kan result-ah an lawm ka ring. Kan hlawhtlinna hi kan vaia tan a ni," a ti.
Season liam ta khan Sanga hian Chanmari FC enkawlin Mizoram Premier League-ah an champion a, tun season-ah MFA Super Cup leh I Day Football-ah an champion leh ta bawk. Chhingcows boss chuan, "Kan hmabak chu Mizoram Premier League a ni," tiin MPL-a champion ngei a tum thu a sawi tel bawk.
A ropui
Chhinga Veng hian Sanga hnuaiah match 16 an khel tawh a, an la chak vek. Hei chauh hi a ni lo a, nomawi pahnih chawi tur hian goal 71 an khung a, match tina goal 5.92 khung ziah ang an ni.
Chhingcows-in hlawhtlinna an chan theih nan Sawmfela'n MFA Super Cup leh I Day Football-ah goal 17 a khung a, match hnihah chiah goal a khung lo. Ramhlun South tlangval hi goal a khung loh ṭumah pawh player pawimawh a ni a, Chhingcows-in chakna goal an khung theihna chhan kha amah vang a ni.
Best player-a thlan R. Malsawmtluanga'n season ṭha tak a hmang a, MPL2 best player Darlawn tlangval hi I Day Football-ah best midfielder-ah thlan a ni tawh a, final luh theih nan BVT lakah goal pawimawh a khung bawk.
Inkhel a hmuhnawm, fans an ṭha a, MPL tinghahhlelhawmtu a ni ngei ang.
Lawmman
Champion Chhinga Veng FC Rs 1,00,000
Runner Up Chanmari FC Rs 50,000
Mimal
Top Scorer Malsawmfela, Chhinga Veng Rs 3,000
Best Player R. Malsawmtluanga, Chhinga Veng Rs 3,000
Champion Kalkawng
CHHINGA VENG
Group Stage
Chhinga Veng FC 5 - 1 Chanmari West FC
CVFC : Malsawmfela 9'; MS Dawngliana 45'; Lalmawizuala 47' (OG); Laldampuia 69', 83'
CWFC : Lalnunmawia 30'
Mizoram Police 2 - 5 Chhinga Veng
MPFC : Lalfakawma 3'; B. Zoramthanga 10'
CVFC : Malsawmfela 21', 76'; R. Laldinliana 62'; MS Dawngliana 62'; Lalkhawpuimawia 79'
Chanmari FC 1 - 5 Chhinga Veng
CFC : Rochhingpuia 75' (P)
CVFC : Malsawmfela 11'; MS Dawngliana 21', 46'; Laldampuia 61', 86'
Chhinga Veng FC 6 - 1 Rhino Charge
CVFC : Laldingheta 14'; Malsawmfela 16'; K. Lalthlahlova 66';Lalkhawpuimawia 69'; Vanlallawma 81'; Laldingngheta 87'
RHI : Lalneihkima 85'
Semifinal
Chhinga Veng FC 2 - 1 Bethlehem Vengthlang FC
CVFC : R. Malsawmtluanga 16'; Malsawmfela 63'
BVT : Ramengmawia 53'
Final
Chanmari FC 1 - 2 Chhinga Veng
CFC : Jakob Vanlalhlimpuia 2'
CVFC : Lalrammuanpuia 56' ; MS Dawngliana 101'