Match nga khel lo tur Cristiano Ronaldo

Real Madrid thiampuipa Cristiano Ronaldo chu match nga chhung inkhel thei lo tura hrem a ni - Portuguese forward hian Barcelona nen Spanish Super Cup an khelh ṭuma hnawhchhuah a nih hnuin referee chu a hnung lam aṭangin a nam a, match official chungah kut a thawh avangin match nga chhung khel thei lo tur hian hrem a ni ta a ni.

Ronaldo hi red card-a hmuhin a ken tel 'match khat' khel thei lo tura hrem sa a ni a, match li dang hi referee kut a thlak avanga 'bonus' a dawn a ni. Real Madrid hian zanin dar 2:30-ah Barcelona chu Spanish Super Cup khel turin an mikhual dawn a, Ronaldo tel loin an inlan a ṭul dawn.

Engvang maw?

Spanish Super Cup first leg-ah Real Madrid-in 3-1 in hnehna an chang a, he inkhelah hian Ronaldo-a'n goal a khung. Portuguese forward hian a goal khung hmasak zawk lawm nan a kawr a phelh a, player-in a jersey hlip chunga goal khung a lawm hi dan phal loh a nih avangin yellow card pek a ni.

Goal a khung aṭanga minute hnih hnu lawkah Ronaldo leh Samuel Umtiti-ten ball an inchuh a, Ronaldo a tlu. Portugal captain-in penalty beiseiin a kut phar chhuak mah se referee-in ngaihdan dang a nei a, Manchester United forward hlui hi a tlu derah ngaiin a yellow card pahnihna a hmuh a, Ronaldo-a'n khelmual a chhuahsan a ṭul.

Hremna chu

Ronaldo-a'n penalty a beisei laia hnawhchhuah a ni hi a hrethiam lo a, he inkhel thununtu Ricardo de Burgos Bengoetxea chu a hnung aṭangin a nam. Referee Ricardo a ngawi mai mai duh bik si lo a, inkhelh zawh report a ziahnaah Ronaldo lungawi loin a hnung lama a nam thu a ziak.

Referee berin a report miau avangin Ronaldo chungchang ngaihtuah a ni a, hremna a tawrh sa match khat piah lamah match li dang khel thei lo tura hrem a ni. Spanish FA danah player-in referee kut a thlaka hremna a tawrh theih nep ber chu match li khelh loh a ni a, Portugal captain hremna hi na hle angin lang mah se a na lo thei ang bera hrem a ni, tihna a ni.

Hmabak

Spanish FA-in Ronaldo an hremna hi an ramchhung inelna atan chauh a ni a, Real tan match 396 a inlan tawha goal 407 khungtu Forward hi Champions League lamah chuan Real tan a inlan thei dawn tihna a ni. Madrid tana chanchin lawmawm chu match nga chhung khel thei lo tura hrem Ronaldo inlan loh hlanin zanina Barca an mikhual tur tih loh chu match lian khelh tur an nei lo.

Real hian August 20-ah an La Liga zinkawng ṭan turin Deportivo La Coruna chu khualmualah an lenchilh dawn a, Valencia leh Levante mikhualin Real Sociedad an lenchilh leh ang a, September 20-a Real Betis an mikhual hunah a inlan thei chiah ang.

Ronaldo tel lo Real

Pre-season chhung zawngin Real-in Ronaldo an chhawr lo a, beisei an phak lo. UEFA Super Cup leh Spanish Super Cup-ah kum 32 mi forward hi bench aṭanga tlan luhtir ve ve a ni a, Ronaldo telna Real hi team dang daih an ni. Zaninah Ronaldo tel loin Real-in Barca an mikhual dawn a, a awlsam dawn lo.

Hetihrual hian Barcelona tan hnehna chang tur chuan goal thum tal khung a ṭul a, Ronaldo tel loin Real an ṭang thei ang em? tih chu zawhna awm a ni - hei erawh hriatreng a ṭha, Nou Camp-ah Ronaldo hnawhchhuah a nih hnuin Marco Asensio-a'n Real tan goal a khung a, an chakna a nemnghet.