Lungleiah Bazar Veng an thiam ber

Nimin khan Lunglei District Football Association buatsaih Inde­pendence Day Football Tour­nament chu Ṭhuamluaia Mualah a hmawr bawk a ni a, Bazar Veng chuan si an phurh hmasak zet hnuah Electric Veng chu 2-1 a lehthalin a zawnin an champion.

Nimina final khelhah Inter Village champion Electric Veng lamin bul an ṭan ṭha zawk a, first half tawp hma chiaha Bazar Veng keeper Lalrindika chetsual vangin LH Dawngzela chuan goal hmahruai a khung. Inkhel chawhnu lamah erawh Bazar Veng hian champion zia chhuahin Isaac Lalruatpuia leh Laltlansanga goal hmanga chhang letin an nomawi an humhim.

Mipa final inkhel hi a boruak a sang hle a, hun tawp dawn lamah Bazar Veng captain R. Hmangaihtluanga leh Electric Veng tana goal hmahruai khungtu LH Dawngzela te chu hnawhchhuah an ni a, team pahnih hian player 10 ni chungin hun tawp an hmang.

Tun hnai kum thum chhung vel chu Bazar Veng hian Lunglei DFA hnuai inelna an thunun hneh hle. Mizoram Premier League lama sulhnu nei tawh winger Isaac Lalruatpuia leh Reitlang FC goalkeeper hlui Lalrindika te awmna team hian I Day bikah a zawna final vawi thum lutin ṭum hnih nomawi an chawi thei a ni.

Kumin I Day bikah hian Lung­lei Super League team pa­riat an inel a, champion team Bazar Veng hian nomawi chawi turin match nga an khelah goal 25 khungin team ṭha ber an nih zia an lantir chiang hle.

Lunglei DFA buatsaih hian a vawi hnih nan hmeichhe inelna buatsaih a ni bawk a, team paruk an inlan. Nimin chawhma lam khan final khelh niin champion lai Zobawk South chuan Venglai 3-0 a hnehin an nomawi an humhim. Zobawk tan hian Lalramhluni chuan goal hnih a khung bakah Remruatpuii chuan goal khat a khung ve bawk.