Barcelona-ah Paulinho lut dawn

Barcelona chuan Bra­zil international Pau­linho lalut turin Chinese club Guangzhou Evergrande chu inremna an neih pui tawh. Tottenham mid­fielder hlui hi pound mak­taduai 36.4 man tur niin Camp Nou-ah season li daih contract a ziak dawn - Ningani hian medical test bakah contract hi ziah fel hman tura ruahman a ni.

Catalan club hian an forward duhlai Neymar chu Paris St-Germain lakah pound maktaduai 200-in an hralh a, Brazil captain a chhuah hnuah Paulinho hi an player lakluh hmasa ber a ni rih. Paulinho hian kum 2013 khan Corinthians aṭangin pound maktaduai 17-in Tottenham a zawm a, a hun laiin Spurs player manto ber ni mah se beisei a phak loh avangin kum hnih hnuah China a pan.

Kum 29 mi Paulinho hian nikum aṭang khan Tite kaihhruai Brazil team-ah hmun nghet a chang leh ṭan a, an ram tan hian match 41 a khelhah goal kua a khung tawh. Tharum a ngahin tawnhriat a nei hnem tawh a, midfield-ah Barca tana player pawimawh ni phak tura ngaih a ni.

Evergrande coach Luiz Felipe Scolari chuan, "Paulinho hloh hi club tan channa nasa tak a ni. Chutih rualin chanchin ṭha a nihna chen a awm, a chhan chu khawvela club liante hian Chinese Super League lam an rawn melh tih a hriat theih a ni," tiin a sawi.

Barca hian season hmasa khan La Liga leh Champions League an chawi phak lo a, inelna lian pahnihah hian an elpui ber Real Madrid chuan hlawhtlinna an chang thung, an player pawi­mawh Neymar an chan tawh bawk si avangin squad tichhah turin transfer bazar-ah an buai mek. Tun dinhmunah Borussia Dortmund for­ward Ous­mane Dembele leh Liver­pool attacking mid­fielder Philippe Coutinho te lak tumin an hel mek.