Transfer tawp hun thlak duh an awm
Premier League club-te chuan nakkuma nipui transfer tawp hun chungchang an sawi ho dawn a, league ṭan hma ngeia tawp tura duh pawl an awm.
Tuna transfer hman lai mekah chuan August 31-ah player inlak theih hun hi a tawp dawn a, Premier League ṭan aṭanga kar thum hnuah an titawp chauh tihna a ni.
September 7 hian transfer tawp hun chungchanga vote lak a ni dawn a, kal dan phung pangngai thlak tur chuan Premier League club 14 zet thu a inhmuh a ṭul ang.
Premier League club manager zingah Liverpool manager Jurgen Klopp leh Swansea boss Paul Clement te chu transfer hun duh zinga langsar pawl an ni. FIFA chuan transfer tawp hun hi September 1 leh hemi hnaih bawr vela tihtawp turin rawtna a siam a, English club-te hian transfer hun an sawn a nih pawhin football dan pui nen a inkalh lo.
Swansea coach Clement chuan, "Transfer zawh vek hnuah league ṭan ila, club tan pawh a ṭha ngei ang. Transfer tawp hun atana August thla tawp kher an ruat hi ka hrethiam lo. Tunah hian tranfer hun sawn chungchanga rawtna a awm a, kei chuan ka ṭawmpui a ni," tiin a sawi.
Transfer hun a la tawp miau loh avangin Southampton (Virgil van Dijk), Swansea (Gylfi Sigurdsson) leh Everton (Ross Barkley) te chu an ṭhat dan berin an la inlan thei lo a, an player zingah chhuah duh avangin rilru khingbai takin league an ṭan.
Liverpool boss Klopp pawhin, "Transfer hun hi tawp tawh se chuan kumin pawh hian kan awlsam phah ang. Mawlmang tak pawhin chhut ila, league ṭan huna kan player neih tur ang kan neih vek chuan game plan thlengin kan ṭhatpui ang," tiin transfer hun sawn a ṭawmpui thu a sawi.
Clement leh Klopp te ṭanna aṭang chuan transfer hun sawn hma hi a fuh thei a, amaherawhchu English club hian Germany, Spain, Italy leh France ah te a danglam hmel loh avangin an chesual thei ang. Tun dinhmunah hian Premier League club ten player lalut thei tawh lo se, Barcelona hian Philippe Coutinho an la chhuhsak theih tho dawn avangin Reds hian Brazilian midfielder thlakna tur lakna hun an nei dawn lo tihna a ni.
Transfer hun sawn hma hian nghawng lian tak a nei dawn a, hei vang hian September 7-a an sawi ho hun hian ngaihven a hlawh a, Premier League club 14 zet an ṭanrual a ṭul dawn avangin an thlak kher erawh a rinawm loh.