Sevilla, Napoli, Olympiakos leh Celtic inlan hun
UEFA Champions League khel tur zawnna playoff first leg chu zaninah khelh zawh a ni dawn a, club lar Sevilla, Napoli, Olympiakos leh Celtic ten Europe-a football club-te tana inelna lian ber an khelh theih nan dinhmun sawhnghet an tum ang.
Istanbul Basaksehir leh Sevilla inkhel Sony Ten 1-ah a en theih ang a, Sony Ten 2-in Napoli leh Nice inkhel an pe chhuak thung ang.
Thlirna Tawi
Italian club Napoli-in Nice an mikhual dawn a, French club hmachhuan tur chu Mario Balotelli a ni. Italian striker hian Napoli hi vawi ruk hmachhawn tawhin chak ṭum a la nei lo (D1 L5).
Istanbul Basaksehir-ah hian Emmanuel Adebayor leh Gael Clichy te an khel a, heng player pahnih hi 2007/08 UEFA Champions League group stage-a Arsenal-in Sevilla 3-0 a an hneh ṭumin an khel ve ve.
Hapoel Beer-Sheva leh Maribor inkhel turah hian Israeli midfielder Marwan Kabha chuan an ram club a hmachhawn dawn. Marwan hma hian Israeli player pahnih Sintayehu Sallalich leh Dudu Biton te chuan Maribor tan hian lo khel tawh a ni.
Celtic leh Astana te hi nikum khan third qualifying round-ah an inhmachhawn tawh a, Kazakhstan-ah 1-1 a an inhnehtawk hnuin Scottish club hian an mualah 2-1 in hnehna an chang.
Olympiacos leh Rijeka te hi an ram chhuanvawr ve ve an ni. Greek club Olympiacos hian Champions League group stage vawi 18-na khelh an tum dawn. Croatian club Rijeka hian 2013-14 leh 2014-15 Europa League group stage an khel tawh a, Champions League group stage erawh an la thleng pha ngai lo.
Champion khel tur
UCL group stage hi team 32 in an khel ṭhin a, heng zinga team 22 chu a hriat tawh. Spain aṭangin Real Madrid, Barcelona leh Atletico Madrid; England aṭangin Chelsea, Manchester City, Manchester United leh Tottenham Hotspur; Germany aṭangin Bayern Munich, Borussia Dortmund leh RB Leipzig; Italy aṭangin Juventus leh Roma; France
aṭangin Monaco leh Paris Saint-Germain; Portugal aṭangin Benfica leh Porto te an ni.
Manchester United-in Europa League an champion avangin England aṭangin group stage-ah team li an awm tawh a, Liverpool-in Hoffenheim an hneh theih chuan team nga an thawh ang. England bakah Spain, Germany, Italy, France leh Portugal te hi playoff khelh ngai loa group stage-a pakhat aia tam club thawh theite an ni.
Heng bakah hian Russia (Spartak Moscow), Ukraine (Shakhtar Donetsk), Switzerland (Basel), Belgium (Anderlecht), Turkey (Besiktas) leh Netherlands (Feyenoord) ten group stage atan club khat ṭheuh an thawh nghal bawk.
Engtin zel?
Champions League hi ram khat champion chauh khelhna a ni lo a, an ramin record an neih ṭhat dan a zirin ram hrang hrang club thawh theih zat a in ang lo. UCL khel tur zawnna playoff pawh hi Champions Route leh League Route a ṭhen hran a ni.
Champions Route hi chu league khata champion te chauh khelh theihna a ni a, an ramin sulhnu an neih ṭhat loh avangin group stage aṭangin bul an ṭan ve thei lo. Playoff hmang hian ram khat champion panga an tling leh ṭhin.
Playoff khelh meka Champions Route zawha la dam club 10 te chu Qarabag (Azerbaijan), Copenhagen (Denmark), APOEL (Cyprus), Slavia Prague (Czech Republic), Olympiacos (Greece), Rijeka (Croatia), Celtic (Scotland), Astana (Kazakhstan), Hapoel Be'er Sheva (Israel) leh Maribor (Slovenia) te an ni. Heng club-te hi an mahni ram ṭheuha champion an ni.
League Route kawng zawha beisei la nei club 10 te chu Istanbul Basaksehir (Turkey), Sevilla (Spain), Young Boys (Switzerland), CSKA Moscow (Russia), Napoli (Italy), Nice (France), 1899 Hoffenheim (Germany), Liverpool (England), Sporting CP (Portugal), Steaua Bucharest (Romania) te an ni.
Playoff second leg hi August 22-23 zanah khelh a ni dawn a, group stage khel tur club 32 chu karleh lamah a hriat ang.