Dinhmun sang inchuh player panga an awm

Serena Williams inkhelh theih loh lai a ni a, tennis hmeichhe player zingah world number 1 dinhmun chelh rei thei an awm meuh lo. Tunkar chhungin Cincinnati Masters khelh a ni dawn a, an chetṭhat dan a zirin player panga chu number 1 ni thei dinhmunah an ding mek.

Cincinnati champion lai Karo­lina Pliskova hian Wimbledon zawh aṭang khan number 1 dinhmun a luah a, mahse beisei ang result a neih chunzawm loh avangin Simona Halep, Angelique Kerber, Elina Svito­lina leh Caroline Wozniacki te chu a dinhmun phetthla thei vek an ni tawh.

Pliskova chuan, "Thil a la inthlakthleng lo, engkim hi ka kutah a la innghat. Pressure insiamchawp ka duh lo a, court chhungah huaisen takin inelna ka hmachhawn mai tur a ni," tiin a sawi. Pliskova hian kuminah Brisbane, Doha leh Eastbourne nomawi a chawi tawh.

Romanina nula Halep-i'n Cin­cinnati Masters nomawi a chawi a nih chuan engti kawng zawng pawh­in Pliskova dinhmun a lauhlan thei dawn. Halep chuan, "World num­ber 1 nih hi thil lian leh ropui tak a ni a, chutih rualin ngelnghet taka khelh theih reng aia hlu a awm bik chuang lo, kan phu a nih chuan he hmunah hian kan la ding ve mai ang," a ti.