Chinese sumdawng kutah Saints
Chinese sumdawng hausa Jisheng Gao chuan Premier League club Southampton-ah neitu nihna 80% zet a nei ta. Gao chhungkua hian Saints an ta neih ta tihna a ni.
Kumin January thla khan Gao-a company Lander Sports Development chuan inremna an neih thu an sawi tawh. Thuneihna neih tak erawh tunhnaia tihfel chauh a ni. Gao chhungkaw chan bak 20% la awm hi kum 2010 aṭanga Saints enkawl tawhtu Katharina Liebherr kutah a awm thung ang.
League One club an nih lai aṭanga Saints neitu ni tawh Katharina Liebherr chuan, "He club hian zirlai thar leh hmachhawp thar a nei dawn a, a phurawm hle ang. Team kan ni a, hmalam kan pan theih nan theihtawp kan chhuah zui zel ang," tiin a sawi.
English club zingah Aston Villa, Birmingham, Wolves, Reading leh West Brom te chu Chinese sumdawng kutah an awm tawh. European club zinga sulhnu neiṭha AC Milan pawh kumin kumtir lam khan pound maktaduai 628-in Chinese sumdawng kutah a lut pumhlum tawh bawk.