Arsenal chak tluang titawptu Man United

Premier League hmahruaitu Arsenal-in Old Trafford-ah table chung bera awm tlak an nihzia pholangin an theihna sang tak lantir mah se an hmelma kumhlun Manchester United lakah an tlawm. Erik Ten Hag hnuaiah United-in harhtharna an chang chho a, Gunners hi 3-1 a hnehin player thar Antony-a'n goal a khung nghal.

Pathianni zanah football hmuh-nawm chhawpchhuah a ni a, Inrinni zan ang thoin VAR-in sawizui a hlawh - Arsenal goal mawi khung an pawm lo. Man United erawhin sawisel boin goal thum an khung a, Antony siamsaktu Marcus Rashford-a'n second half-ah goal hnih dang a khung.

Ten Hag-a hote match hnih an chak loh zawn hnuah match li an chak zawn leh tawh a, inelna ṭantirh lama table mawngphaha awm team khan hmahruaitu Gunners an phak lohna chu point thum chauh a ni ta.

A goal lo maw?
Arsenal-in Martin Odegaard leh Oleksandr Zinchenko te an chhawr thei a, amaherawhchu Thomas Partey leh Mohamed Elneny te an inhliam avangin loh theih loin Albert Sambi Lokonga-a'n midfield-ah hmun pawimawh a chan phah.

Mahni muala khel Man United-in nung takin inkhel bul an ṭan a, Arsenal erawh a huna nawr let thei turin an inkau reng. Minute 12-naah Odegaard-a'n United midfielder Christian Eriksen ball chhuhsakin Bukayo Saka chuan ball fing a pe lut nghal a, Brazilian forward Gabriel Martinelli chuan tawih zetin goal kilah a dah.

Arsenal-in hmahruai nghal mah se VAR hmangin ennawn an ni a, referee Paul Tierney-a'n thil thleng lai chiang taka a hmuh chu mual sira monitor a en hnuah a ngaihdan a thlak a, 'foul' a ham leh hnuhnawh. Gunners ṭantute an lungawi lo a, chutihrualin replay aṭanga thlir chuan Odegaard-a'n Eriksen ball a chhusak dan a dik tawk lo tih a chiang. Goal-ah pawm se United ṭantute an lawm lo thung ang.

Hei le, Antony
Cristiano Ronaldo bench-ah a awm chhunzawm a, Casemiro pawhin bul a la ṭan thei lo. Pound maktaduai 82 man Antony erawh bul ṭantir nghal a ni a, Brazilian forward hian a theihna a pholang nghal.

Antony hian hmun chep tak karah nalh zeta ball khengin player special a ni tih a pholang a, minute 35-naah hmahruaina goal khungin a kawr hmaa club badge chu a fawp nghal.

United hian goal khung turin vawi 18 an in pass a, keeper David de Gea pawh telin referee Tierney-a'n 'advantage' a pe ṭha a, Rashford ball pass a tawk a, Antony-a'n a tawp a khar ṭha bawk.

Coach class Arteta
Arsenal coach Mikel Arteta-a'n halftime hun a hmang ṭha a, second half-ah Gunners ṭha zawk an rawn inlar. London club-in mualneitu United player-te an kat kual a, Spanish manager hnuaiah Arsenal game a class hle.

Bukayo Saka-a'n Mohamed Salah dah niltu Tyrell Malacia chu a duh hun hunah a paltlang emaw tih mai tur a ni a, Gabriel Jesus pawh a hnawksak hle. Man United an insiamṭha thei lo a, minute 60-naah Arsenal-in an phu ang ngeiin Saka hmangin an khung.

Rashford leh Ronaldo
United-in goal an chhuah hma hretin Cristiano Ronaldo-a'n Antony a rawn thlak a, Portuguese forward hi buaina thlentu ni thei dinhmunah a ding. Mahse, Ronaldo hian tlarhmaah Rashford a neih loh tharum a rawn lantir a, game thlak danglamtuah a chhal theih.

Arsenal-in defensive midfielder ṭha an neih loh an tuar zui a, Sambi Lokonga-a'n midfield a ti phui zo lo. Minute 66-naah Bruno Fernandes-a'n ball ṭha bik a pe lut a, ball um luttu Rashford-a'n goal pawimawh a khung.

Mikhual team-in siphurh sut an tum a, Arteta-a'n risk la chhunzawmin Emile Smith Rowe, Fabio Viera leh Eddie Nketiah te a rualin a luhtir. Mahse, Spanish manager thutlukna a fuh tawk lo niin a lang - an attack a nat phah loh bakah midfield a phui phah lo.

Minute 75-naah Fernandes ball fing chu Eriksen-a'n um lutin Danish midfielder hian Rashford pe lehin, English forward hian chak nemnghehna goal a khung. Man United-in player quality sang Eriksen leh Fernandes te an neih an chhawr ṭangkaiah a ngaih theih.

Ten Hag-a'n Casemiro leh captain Harry Maguire te a luhtir a, English defender hian minute khat lekah 'yellow card' hmu nghal mah se United-in point thum hmu turin harsatna lian tham an tawk tawh lo.

Man United ṭantute suangtuahna a kal thui tih ka hria. Mahse bul kan la ṭan chauh a ni a, kan tum ram hi kan la hlat a ni. Kan rilru put thlak turin theihtawp kan chhuah a, ni tihin kan hmachhawp kan tihsan a ngai. Player zawng zawngin Carrington-ah (training-na hmun) an theihna zawng zawng an phochhuah a ngai. Nomawi chawi tur chuan insiamṭhat kan la mamawh a, hmasawnna tur ṭhahnem tak a la awm a ni. - Erik ten Hag, Man United manager

Referee-te thutlukna hi a ngelnghet lo. Kar liam ta khan Aston Villa-in Aaron Ramsdale laka an foul chungin goal an khung a, a chian tawk loh avangin foul a ni lo. Villa lakah tho hian Saka laka an foul pawh penalty a ni lo. Man United lakah erawh kan chunga foul ni lo kha foul-ah an pawm a, goal min pawmsak lo. Hriatthiam a har hle. Chutihrualin hun pawimawhah kan inthlahdah a, goal hmaah kan hriam tawk lo. Tun ai khan huaisen hret ila, kan chak thei ang. Zirlai thar kan zir a, Old Trafford-a chak kan duh a nih chuan tihsual neih a thiang lo. - Mikel Arteta, Arsenal manager