Daniil Medvedev hnehtu Kyrgios

World number 1 a ni a, tournament khelh lai US Open champion a ni bawk - mahse nimin zing khan Daniil Medvedev chu Nick Kyrgios lakah a tlawm. Australian tlangval Kyrgios hian quarterfinal-ah chuan Karen Khachanov a hmachhawn leh ang.

Flushing Meadows, New York-ah Kyrgios-a'n darkar hnih leh minute 53 chhungin 7-6 (11), 3-6, 6-3, 6-2 in hnehna a chang a, chak lo zawk Medvedev hian nomawi bakah ranking chhuak tharah chuan number 1 nihna a hloh dawn.

Wimbledon finalist Kyrgios hmachhawn leh tur Khachanov hian inkhel dangah Pablo Carreno Busta chu 4-6, 6-3, 6-1, 4-6, 6-3 in a lo hneh ve thung. Russian tlangval Khachanov-a'n a hnampui Medvedev tan phuba laksak a tum ang.

Seeded 23-na Kyrgios chuan, "Daniil hi player ropui leh ṭha bik a ni a, fans lam pawhin a lakah beiseina an nei sang hle. Kan inkhelh dawn khan ka chak ringtu an awm kher lo ang, mahse infiamna huangah chuan result hi sawi lawk theih a ni lo.

"Tun hnaiah tournament ka khel hnem hle mai a, thla li chhung chu ka chhungte bulah pawh ka awm ta lo. Hetih chhung hian team lamin min thlawp ṭha hle a, anni hian tun dinhmun thleng turin min kaihruai," tiin a sawi.

Season kal laiah Kyrgios hian match 35 hnehna a chang tling tawh chiah a, ṭum kua chu a chak lo zawkah a ṭang thung. A vawi khat nan Grand Slam champion nih a tum dawn a, title la tur chuan match thum chak a la ngai dawn.

Inkhel dangah Matteo Berrettini pawh a chak. Italian tlangval hian Alejandro Davidovich Fokina hneh tur erawhin vanneihna a mamawh tel, set nga zet an khelh hnuah 3-6, 7-6 (7-2), 6-3, 4-6, 6-2 in hnehna a chang.

Medvedev a tla a, player ṭha Novak Djokovic a inlan thei lo bawk. Rafael Nadal tan Grand Slam nomawi neih belh theihna kawng a inhawng mek, Spanish star hian nizan khan last 16-ah Frances Tiafoe a hmachhawn, result erawh kan hre hman lo.