Pakistan-in India lakah phuba an la
Asia Cup kaltlangin cricket hmuhnawm bik chhawp chhuah a ni a, Pathianni zan khan Pakistan-in India lakah phuba lain wicket ngain hnehna an chang. Pakistan, Sri Lanka, India leh Afghanistan te chauh an dam tawh a, Super 4-ah group match-a chak lo zawk an chak ve ve avangin team an intluk tlang tih a lang.
Dubai International Stadium-ah India-in bat hmasain 181 runs an siam a, chakpui tham target siam mah se Pakistan-in ball khat chauh bangin 182 runs an siam a, hnehna an chang. Super 4-ah hian team pali hi vawi khat ṭheuh an inkhel kual dawn a, a sang pahnihin final an khelh dawn avangin India tan chetsual a thiang tawh lo.
Zanin dar 7:30 hian India-in Afghanistan hnehtu Sri Lanka an hmachhawn dawn. Men in Blue hi an chak zo lo a nih chuan final luh beiseina a tawp ang a, Pakistan laka phuba lak theihna an bawhpelh bawk ang.
India tan Kohli
Ṭhumvawrah Pakistan an chak a, Babar Azam-a'n vawm hmasak thlang mah se a an tifuh chiahin a lang lo. India opener Rohit Sharma leh KL Rahul ten powerplay hmang ṭhain an inkawp hian 22 runs an siam hman. Tawnhriat nei ṭha Virat Kohli-a'n a theihna a pholang zui a, India captain hluiin 60 runs a siam.
Pakistani spinner Shadab Khan leh Mohammad Nawaz te an rawn che ṭha a, India batter-te kalfawr tur an veng. Kohli a ṭang rei thei a, batter dang chu rawn lutin run tlem rawn siamin an chhuak leh mai zel. A tawpah erawh India-in 181/7 runs an siam a, ngaih ṭha takin an awm theih phah ang.
Beisei pha lo bowler
India tan batter-ten an hna an tlin a, Ravindra Jadeja inhliam a lang lo. Amaherawhchu bowling lamah erawh India tan tawnhriat nei bowler awm loh a lang. Men in Blue hian Pakistan captain Babar Azam chu 14 runs chauh a siam tihin vawm hlum mah se Mohammad Rizwan an vawm hlum mai thei lo.
Rizwan hian 71 runs tehmeuh a siam a, India bowler zingah Ravi Bishnoi tih loh chu an che ṭha tawk lo. Pakistan tan Mohammad Nawaz a rawn che ṭha bawk a, over 15.3-ah wicket thum hloh chauhin 136 runs an siam a, India bowler-ten wicket an lak theih loh avangin risk la thei dinhmunah Shaheens an ding.
Hun tawp lam boruak sangah Asif Ali ball vuak awlsam taka man theih chu Arshdeep Singh-a'n a thlauh a, a fimkhur tawk lo - hei hi India chak loh chhanah a mawhpuh theih. Pakistan hian ball 15-ah 31 runs siam an la mamawh a, Asif Ali-a'n six vawi khat leh four vawi hnih dang la vaw zuiin a tawp thleng zo lo mah se Pakistan chakna kawngah a pawimawh hle.
Over tawp berah Pakistan dinhmun a ṭha tawh zawk a, a tawp dan erawh a awlsam lo. Shaheens hian ball hnihah runs hnih an la mamawh a, Iftikhar Ahmed-a'n run hnih siamin ball khat dangin an chak. Over tawp ber vawmtu Arshdeep Singh-a'n a tihsual a siam ṭha thei lo a, Pakistan lakah India an tlawm.
Zanin hian India-in Sri Lanka an hneh theih a nih chuan Asia Cup-ah India vs Pakistan Part III beisei tur a la awm ang.