San Marino roreltu Bagnaia

Francesco Bagnaia chu second 0.034 lekin Enea Bastianini hmaah a thleng a, intlansiak hmuhnawm takah San Marino Grand Prix-ah hnehna a chang. Ducati rider zingah a zawna MotoGP inelna huanga vawi li chak thei hmasa a ni.

Italian tlangval hian pathumna aṭangin bul a ṭan a, minute 41 leh second 43 chhungin hnehna a chang a, a hnungah Bastianini leh Maverick Vinales te an awm thung, nomawi beiseina a la chhawm nung zel.

Rider championship hmahruaitu Fabio Quartararo chu panganaah a thleng thung. Quartararo hian point 30 in hma a la hruai fal a, a hmahruaina hi tam viau mah se intlsansiak pakhatah point 25 a hmuh theih, an dinhmun a la inthlak thei.

San Marino GP hi Andrea Dovizioso tan chuan a hun hnuhnung a ni nghal. Italian rider hian intlansiak an neih hmain a tana hun tawp a nih tur thu a sawi lawk a, bike intlansiakna sang bera a tlan hnuhnung berah hian 12-na dinhmun a luah.

Kum 36 mi Dovizioso hian MotoGP hi kum 21 chhung a chamchilh a, intlansiak vawi 346 hmachhawnin ṭum 24 hnehna a chang - a sang zual pathum chinah vawi 103 a tel bawk.

Dovizioso tan 2017 season kha hriatreng a ni tawh ang. Intlansiak vawi rukah hnehna a chang a, heng zingah hian an ramah leh British Grand Prix-a hnehna a chan a tel, season hmang ṭha viau mah se khatih laia vanglai hmangtu Marc Marquez a tluk ta lo a ni.