Hei le Champions League - Chelsea & City inlan zan

Mizo ten kan nghahhlelh, ni lo, football khawvelin a nghahhlelh tih tur zawk a ni e - Champions League chu zanin hian khelh ṭan a ni leh dawn ta a, Premier League club zingah Chelsea leh Manchester City an inlan dawn.

Nipui transfer-a European club zinga sum hmang hnem ber Chelsea chu zanin dar 10:15 hian an inlan dawn a, khualmualah Croatian club ṭha Dinamo Zagreb an lenchilh dawn - a awlsam lo ang.

Premier League team hmuhnawm City chu zanin dar 12:30-ah hian an inlan dawn bawk a, league-a chak zo lo hlim Pep Guardiola enkawl team hian khualmualah Sevilla an lenchilh dawn.

Beiseina nen
Chelsea-in beisei angin season bul an ṭan lo a, league match ruk an khelh tawhah vawi thum chiah an la chak a, vawi khat draw result neiin vawi hnih an tlawm - nipui transfer-a pound maktaduai 272 sengtu team tan result ṭha a ni lo.

London club tan zanin hi insiamṭhat hun a ni a, Dinamo khelmualah an chak chuan inrintawkna an neih belh ang - mahse, Thomas Tuchel-a enkawl team hian an ṭhat dan berin an khel thei dawn lo.

Tun hnaia chesual ngun tak goalkeeper Edouard Mendy chu a inhliam mek a, a hmun ruakah Kepa Arrizabalaga chu si ban nghak tura beisei a ni - Senegalese keeper Mendy tan chawlh hahdam a, insiamṭhatna remchang a ni thei.

3-4-2-1
Tuchel-a'n 3-4-2-1 formation a hman ngei a rinawm a, striker thar Pierre-Emerick Aubameyang a la chhawr theih hmel loh avangin Kai Havertz chungah rinna a nghatin a rinawm a, Inrinniah league match khel tura Fulham an lenchilh lehnghal dawn avangin Raheem Sterling chu chawlh hahdam tir a nih pawhin a mak lo ang.

Chelsea a pan hnua beisei phak lo Marc Cucurella aiah Ben Chilwell chu inlan tura beisei a ni a, N'Golo Kante a la inhliam avangin a club hlui hmachhawn turin Mateo Kovacic leh Jorginho an inkawp a rinawm a, tlarhnung chu Kalidou Koulibaly, Thiago Silva leh Wesley Fofana ta a ni.

Tun season-a league match riat an khelha la tlawm lo Zagreb-in mahni muala tlawm chunga CL season ṭan nghal an duh dawn lo a, tlarhmaah goal khung khawl Bruno Petkovic leh Josip Drmic te an chet ṭhat a ṭul - an group-ah AC Milan an awm tel tih hriat a ṭha.

Hei le City
Manchester City-in zanin dar 12:30-ah Sevilla an lenchilh dawn a, Sevilla hi league match li an khelh tawha point khat chiah la nei an nih avangin Pep-a naute tan a harsa lo tura ngaih a ni.

Nipui transfer-ah Sevilla hian centre back ṭha pahnih Joules Kounde leh Diego Carlos an chân a, anni pahnih awm loh a langsar a, an league match hnuhnung bera Barcelona 3-0 a an ngam loh ṭumin tlarhnung a nghing nasa lehzual.

City-a tlangnel nghal Erling Haaland tan hei hi chanchin lawmawm a tling a, Premier League-a goal 10 khung tawh striker hian goal nena Champions League season bul ṭan a duh dawn.

Mahse...
Tun season-ah City hi che ropui viau angin lang mah se, league match ruk an khelhah vawi li chiah an la chak - vawi hnih draw an nei a, Haaland-a'n goal khung reng mah se Norwegian striker khelh dan leh City khelh dan system an la insiamrem lo tih a lang ṭhin.

Pep-a tana ngaihtuah tel ngai chu kartawpa Tottenham Hotspur nena league match an khel tur hi a ni a, Aymeric Laporte leh Kyle Walker te chu hliam vanga an inlan theih a rinawm lo bawk. Walker a inlan loh chuan right back-ah Joao Cancelo a awm ang a, Sergio Gomez emaw Nathan Ake emawin left back hna an chelh thung ang.

Sevilla hian tun season-ah beisei phak lo mah se Croatian midfielder Ivan Rakitic, Argentine forward Erik Lamela leh Morocco striker Youssef En-Nesyri neitu an ni a, City hrem turin theihna an nei.