Ortiz ngamtu Andy Ruiz Jr

World heavyweight champion hlui Andy Ruiz Jr chuan Luis Ortiz chu unanimous decision hmangin a hneh a, judge pahnihin 114-111 ve vea Ruiz chaktirin, judge pakhat chuan 113-112 in hnehna a chantir ve bawk.

Kum 32 mi Ruiz hian Ortiz hi vawi thum ngawt a hnek thlu a, round hnihnaah vawi hnih a hnek tlu a, round sarihnaah vawi khat a hnek tlu leh bawk - Ruiz a chungnung hle.

American boxer, Mexican thisen kai boxer chuan, "Champion nih leh ka duh a, Mexico-a champion belt hawn leh ka duh a ni," a ti a, mahse, tun atan chuan amah ang thoa champion hlui Deontay Wilder hmachhawn phawt a duh.

Ruiz hian June 2019 khan boxing khawvel barakhaihin Anthony Joshua a ngam a, IBF, WBO leh WBA title a hlawh chhuak. Mahse, December-ah British boxer nen hian an intawng leh a, a title a hloh.

Vawi 37 fight a hmachhawn tawha vawi 35 hnehna chang thei Ruiz chuan, "Boxing mawi tak khel chhuakin, counter-ah pawh ka ti ṭha ṭhin hlein ka hria. Pressure pe chunga nawr ringawt loin, class dang daih ka pholangah ka inngai," a ti.

Kum 43 mi Ortiz hian vawi 38 fight a hmachhawna vawi thum a tlawmna a ni thung a, vawi 33 chakin, vawi hnih chu no contest a ni - Wilder nen vawi hnih an inhmachhawnah a tlawm ve ve a, a vawi thum nan fight beisei mah se Ruiz lakah a tlawm leh ta.

Wilder hian a zawna Tyson Fury a ngam loh hnuah, October khian Robert Helenius a hmachhawn dawn - mahse, Ruiz-a'n hmachhawn ve leh a duh a, Wilder nen hian promoter atan Al Haymon ve ve an hmang.

Ruiz chuan, "Al Haymon hian he fight hi a thlentir thei ang, i ti ngei ang u," a ti a, Wilder chuan, "Fan-te en châk tur inhnek chhawpchhuah hi kan duh reng ṭhin. Inhnek hmabak ka nei a, hei hi ti zo phawt ila, Ruiz nena inhnek a ṭul a nih chuan kan ti thei ang," a ti a, Ruiz vs Wilder kan hmu mai thei.