PSG tan zaninah fiahna hautak
French football-ah Paris Saint-Germain an vawk lal len a, league match ruk an khelh tawhah vawi nga chakin, vawi khat an in draw - goal 24 zet an khung a, an lama lut zat chu goal li chauh a ni!
Tlarhmaah Kylian Mbappé chuan match ngaah goal sarih a khung tawh a, match sariha goal kua khung tawh Neymar leh match sariha goal li khung tawh Lionel Messi an la awm bawk - Italian football-a striker hmuhnawm ber pawl ni ṭhin Mauro Icardi chuan tun season-ah match khat pawh a la khel lo!
Mahse, PSG hian Ligue 1-ah fiahna hautak an tawk lo, tiin sawi theih a ni a, league-a an elpuite nen an inthlau lutuk hret. Mahse, zanin dar 12:30-ah fiahna hautak an hmachhawn dawn a, Juventus an mikhual dawn.
Duh ber
PSG neituten an duh ber chu Champions League a ni a, hei vang hian sum pawh an ren lo - Mbappe an chelh chhan a ni a, man to taka Neymar an lei ngam chhan a ni a, kar khata pound maktaduai khat bawr vel hlawha Lionel Messi an neih ngam chhan a ni a, Sergio Ramos an neih chhan a ni bawk.
Coach Christophe Galtier pawhin a pute duh hi a hrechiang a, an league match hnuhnung bera Nantes laka an chak ṭum pawhin Sergio Ramos, Neymar, Nuno Mendes leh Renato Sanches te chu bench aṭangin an lut ve chauh a, zaninah chuan bul an ṭan a rinawm.
Galtier-a'n PSG a enkawl hnuah Keylor Navas aiah Gianluigi Donnarumma a duh zawk tih a lantir a, mahse, zanin erawh Champions League khel tur an nih avangin tawnhriat nei ṭha zawk Navas-a'n si ban a nghak a nih pawhin a mak lo ang.
Hello Di Maria
Serie A roreltu ṭhin an ni a, mahse, tun hnaiah beisei an phak lo - Massimiliano Allegri hoin insiamṭhat tum mah se tun season-a league match nga an khelhah vawi hnih chiah an la chak a, PSG hneha CL bul an ṭan theih ngat chuan fan-ten an chungah rinna an nghat ang.
Juve hian Paul Pogba, Adrien Rabiot, Wojciech Szczesny, Marley Ake, Kaio Jorge leh Federico Chiesa te chu hliam vangin an chhawr theih a rinawm loh a, a pawi ber erawh PSG tan match 295-a goal 92 khungtu, tun season-a Juve pantu Ángel Di María dinhmun a chiang lo.
Fiorentina nen 1-1 a an inhnehtawk ṭuma lakchhuah Di Maria hi a inlan thei lo a nih ngat chuan Juve tan chânna a tling dawn a, PSG tan inthlahdah erawh a thiang chuang lo - Juve hian league match lia goal li khung tawh Dušan Vlahovic an nei tlat.
Champions League - Group Stage
Zanin Inkhel Tur
Group E
Dinamo Zagreb 10:15 PM Chelsea
RB Salzburg 12:30 AM AC Milan
Group G
Borussia Dortmund 10:15 PM FC Copenhagen
Sevilla 12:30 AM Manchester City
Group F
Celtic 12:30 AM Real Madrid
RB Leipzig 12:30 AM Shakhtar Donetsk
Group H
Paris Saint-Germain 12:30 AM Juventus
Benfica 12:30 AM Maccabi Haifa
September 7, Nilaini Zan
Group A
Ajax 10:15 PM Rangers
Napoli 12:30 AM Liverpool
Group D
Eintracht Frankfurt 10:15 PM Sporting Lisbon
Tottenham Hotspur 12:30 AM Marseille
Group B
Atletico Madrid 12:30 AM Porto
Club Brugge 12:30 AM Bayer Leverkusen
Group C
Barcelona 12:30 AM Viktoria Plzen
Inter Milan 12:30 AM Bayern Munich