A vawi khat nan Roma an tlawm

Jose Mourinho enkawl AS Roma chuan tun season Serie A bikah ngam loh an tawng ve ta. Pathianni zan inkhelah Roma hi Udinese mualah 4-0 ngawtin an tlawm a, table chung ber aṭangin panganaah an tlahniam nghal.

Udinese tan Destiny Udogie, Lazar Samardzic, Roberto Pereyra leh Sandi Lovric ten a khat mawi tawkin goal an inkhung chhawk a, mikhual Roma lamin a chhanletna an nei ve lo.

Roma manager Mourinho-a'n tlarhmaah Tammy Abraham, Paulo Dybala leh Lorenzo Pellegrini te dah mah se an goal nawr a na tawk lo a, match danga inkawp rem tak ni ṭhinte khan target zawna pet vawi hnih bak an nei thei lo a ni.

Serie A match nga an khelh tawhah Roma hian point 10 an hmu a, an chungah hian Udinese, Atalanta, AC Milan leh Napoli te an awm. Hmahruaitu Napoli nen an inkarah point khat chauh a awm a, match khat lekah an dinhmun a la inthlak vek thei.