Ban hmabak Rodgers?

Leicester City an che fuh thei lo, an hneh theih tura ngaih lakah pawh an mualpho chhunzawm zel. Pathianni zan Premier League inkhelah Foxes hi Brighton lakah 5-2 teh meuhin an tlawm.

Foxes lamin Kelechi Iheanacho hmangin second 51-na lekah goal an khung ṭan a, mahse awmzia a nei thui lo, an defender Luke Thomas-a'n anmahni lama a tih luh bakah Alexis Mac Allister chuan goal hnih khungin Moises Caicedo leh Leandro Trossard ten an khung bawk.

Brendan Rodgers-a naute hian tun season league match vawi ruk an khelhah chak an la nei lo, vawi nga tlawmin ṭum khat chu an khingpui nen an inhnehtawk - point khat chauh an la neih avangin an dinhmun a ṭha lo takzet.

Premier League club zingah Bournemouth chu tun season-a manager ban hmasa ber an ni a, an ban tak Scott Parker hnung zui thei zingah Rodgers hi a buk a rit hle.