A thiam pariat zingah Gauff

Coco Gauff chuan a vawi khat nan US Open quarterfinal a lut. American tleirawl hian Chinese player Zhang Shuai chu darkar khat leh miniute 56 chhungin 7-5, 7-5 in a hneh.

Nimin zing Arthur Ashe Stadium-a inkhelah Gauff hian ṭan a hlawh hle, tun inelna kal laiah hian set hloh miah loin last 16 a paltlang thei. Quarterfinal-ah chuan Caroline Garcia a hmachhawn leh ang.

Kum 18 mi Gauff chuan, "Ashe Stadium-a inkhel entuten ka hming an lam ri dual dual a, ka tan chuan awmdan tur pawh thiam a har zawk hle. Zhang khan tharum a ngah em em a, a ball vuak a na hle bawk.

"Keima chakna hmang chuan hneh mai theih chi pawh a ni lo, fans puihna vanga chak ka ni. Anni khan thahrui min pek belh, set thum khelh ngai loa ka tlang thei maite kha a lawmawm zual," tiin a sawi.

Gauff-i hmachhawn leh tur Garcia hian Alison Riske-Amritraj chu 6-4, 6-1 in a hneh, tun hnaiah a zawna match 10 a chak zawnna chiah a ni a, inelna lian Grand Slam huangah quarterfinal a luh vawi hnihna a ni bawk.

Inkhel dangah Serena Williams hnehtu Ajla Tomljanovic a la chak zel. Australian player hian Ludmilla Samsonova chu 7-6 (10-8), 6-1 in a hneh, set khatna bikah hian 4-1 zeta a hnufual hnuah a tho chhuak thei - a rilru huaisen zar a zo.