Point 109 zetin Verstappen a sang fal ta

Max Verstappen chuan Formula 1 nomawi a kawl lai a humhim ngei dawn niin a lang ta. Red Bull driver hian an rama inelna neih zawh tak Dutch Grand Prix-ah hnehna a chang a, championship table-ah point 109 teh meuhin a sang fal ta.

Champion lai Verstappen hian intlansiak chanve hnu lama safety car luh hnuah Lewis Hamilton a tlan pel a, season kal laia intlansiak 15 an neih tawhah ṭum 10 zet hnehna a chang ta, a tan kum ṭha a ni chiang hle.

Mercedes driver George Russell chu pahnihnaah a thleng a, season tir lama champion beisei zinga mi Charles Leclerc chu podium lawn phak zingah a awm bawk - Ferrari driver tan hian title beiseina la thamral chiah lo mah se a tlem tawh hle.

Verstappen chuan, "Team puihna kan dawng ṭha, anni lamin kan mamawh leh ṭangkai tur zawng zawng min chinfelsak a, keini chu a hmuanrua chauh kan ni," tiin a team Red Bull a dahsang hle a, an boruak a ṭha tih a takin a lang.

Team championship lamah Red Bull hian point 511 hmuin hma an hruai a, hun rei tak chhung F1 thunun tawhtu Mercedes chuan point 376 an hmu thung. Tun hnai khan Hamilton chuan Red Bull hmasawnna chu ropui a tih thu a lo sawi ve tawh bawk.

Vawi sarih champion tawh Hamilton chu palinaah a thleng, intlansiak laklawh laiin British tlangval hian radio kaltlangin a team chu,"Ka ring zo lo che u," a ti! Mahse, inelna an neih zawh hnuah a thu sawi avang hian ngaihdam a dil zui leh nghal a ni.

Mercedes driver Hamilton chuan, "Pahnihna dinhmun ka hloh a, hnehna chan tuma ka beih nasat lai taka ka dinhmun a chhia kha hrehawm ka tiin rilru pawh a buai. A nihna takah chuan team hnena ka thu sawi pawh kha ka hrechiang lo, ka tihpalh a ni," a ti.