Hoffenheim ngamtu Reds tan Champions League a hnai

Liverpool chuan Champions League group stage khel turin pen khat chiah an mamawh ta - Thawhlehni zan khan Champions League playoff-ah Hoffenheim chu 2-1 in an luhchhuah a, August 23 zana an inhmachhawn leh hunah goal khat aia tam an chhuah loh chuan Europe-a club inelna sang ber khel turin an inpetkai ang.

Reds tan rawlthar duhawm Trent Alexander-Arnold-a'n free kick hmangin goal ropui a khung a, James Milner-a ball pet ṭha tak chu Havard Nordtveit-a'n an lamah a ti lut bawk.

A ngai tein
Liverpool boss Jurgen Klopp-a'n Barcelona nena sawizawm hlawh mek Philippe Coutinho chu Germany-ah a hruai tel lo a, Premier League-a Watford nen 3-3 a an inhnehtawk ṭuma a starting eleven bawk a chhawr nawn - Mohamed Salah leh Roberto Firmino ten an hun ṭha neih chhawr se chu goal hnih aia tam an khung ngei ang.

First half-ah Firmino ball pek hmangin Salah-a'n hun ṭha nei mah se Egyptian winger hian hmun awl a insiam hnuah goal-ah a chantir thei lo a, Firmino-a'n Sadio Mane hnen aṭanga ball ṭha a hmuh hnuah hnai set sawtah a pet lut thei lo bawk - forward pahnih goal khung loh hi Watford laka an goal khungna 'ang' a ni a, an vanduai a ni.

Chhandamtu Mignolet
Liverpool-in an buaina ngai tlarhnung lamah an la buai reng tih an pholang nawn a, Dejan Lovren-a'n Serge Gnabry a tih tluk avangin minute 11-na lekah penalty a chawi. Mahse, Hoffenheim tana pettu Andrej Kramaric-a'n chhe zetin a pet a, Liverpool keeper Mignolet tan dan nuam tawk vel a ni.

Mignolet-a penalty dan hi Kramaric penalty pet ṭhat tawk loh vang ni bawk mah se hemi piah lamah Belgian goalkeeper chet dan hmuh hmaih theih a ni lo - hnai set sawt aṭanga Gnabry hun ṭha neih chu a dan sak a, box chhung aṭanga Nadiem Amiri pet goal ngei tur nia lang chu a dang bawk. Hetihrual hian hun tawp nan minute hnih chiah a awm tawh tiha Mark Uth goal khung erawh Mignolet-a'n a dang thei lo - German striker tana hmun awl siamsaktu Reds tlarhnung chu dem tur an ni.

A hming chu Arnold
Liverpool-in minute 35-naah free kick an hmu a, senior player tam tak karah season hmasaa first team-a hmun chang ṭan ve chauh Alexander-Arnold a lo pen chhuak - kum 18 mi right back hian goal kil sirah mawi em emin a khung a, 'world class' goal a ni. Kum riat mi lek a nih aṭanga Reds zawmtu defender chuan, "Sawifiah ngaihna ka hre lo, ka tan chuan a hlu a ni," tiin a goal khung chungchang a sawi.

Reds academy coach Steven Gerrard chuan, "Player ṭha bik a la ni ang," tiin an rawlthar duh­awm chungchang a sawi a, Arnold chuan, "Ka mi ngaihsan hnen aṭanga fakna dawn hi a ropui a, a thusawi hi a taka thlentir ka tum ang," a ti.

Eng nge an sawi?
Liverpool boss Jurgen Klopp chuan, "Hoffenheim khan khelh tum dan an nei a, chutihrualin keini kha wing lamah kan innghat mah mah niin ka hmu. First half-ah kha chuan ka hlauthawng a, mahse football ṭha tak kan khelh chuan hmun awl in siamin goal khungna hun kan nei leh mai ṭhin, " tiin an result-ah a lawm thu a sawi.

Hoffenheim coach Julian Nagelsmann chuan, "Draw result tal chu hlawhchhuah kan phuin ka hria. Huaisen takin kan khel a, chutihrual chuan second half-ah khan risk kan la nasa mah mah a ni. Game kaldan kha thlir let ila, penalty kan hlah zawng zawng nen kan vanduai a ni," tiin chak loh an phu loah a ngai.

Inkhel Chhehvel
• Liverpool-in Champions League qualifying match khualmuala an khelh tawh vawi kuaah tlawm hmel an la hmu lo - vawi sarih chakin vawi hnih an khingpui an inhnehtawkpui.
• Mignolet-a'n Reds tan penalty a hmachhawn hnuhnung pasarihah vawi li a dang ta a, Liverpool a zawm hnuah penalty vawi 20 hmachhawn tawhin vawi sarih a dang a, chu chu 35% a tling hial.
• Trent Alexander-Arnold-a'n Reds tan match kuaah chiah inkhel bul a la ṭan a, a goal khung kha Liverpool tana a goal hmasa ber a ni.
• Liverpool-in Eruope-a an away match hnuhnung pakuaah a vawi khat nan goal hnih an khung tling ve leh ta.