Gareth Barry-a'n West Brom a zawm

England midfielder hlui Gareth Barry chuan Everton aṭangin kum khat chhung atan West Brom a zawm a, a man zat tarlan a ni lo. Everton hian Swansea City midfielder Gylfi Sigurdsson lalut turin inremna an siam thu an tarlang bawk.

Kum 36 mi Barry hian Premier League season 21 chhung a khel tawh a, heng hun chhung hian Aston Villa, Manchester City leh Everton tan a league match khelh zat belhkhawm chu 628 a ni - match khel hnem ber Ryan Giggs (632) aia a khelh tlemna chu match li chiah a ni.

West Brom manager Tony Pulis chuan, "Barry hi player ṭha bik leh in­khelh tam duh a ni a, ani nena thawhdun hlan ka nghakhlel tawh hle," tiin a player thar chungchang a sawi. Baggies hian Barry hma hian Jay Rodriguez, Zhang Yu­ning leh Ahmed Hegazi te an lalut tawh bawk.

England tana match 53 khel thei Barry hian Premier League match khel hnem ber ni turin match nga bak a mamawh tawh lo a, tun season chhungin record thar a siam thei tura ngaih a ni.

Tun nipui transfer chhunga che na tak Ever­ton hian Barry chhuahtir mah se a hmun ruak luah tur an nei nghal dawn. Swans aṭang an lak tur Sigurdsson hi pound maktaduai 45 man vel tura ngaih a ni.

Season hmasa league goal kua a khung bakah assist vawi 13 neitu Ice­land international hi nimin khan Goodison Park-ah medical test nei tura tih a ni a, he thu buatsaih lai hian a result kan hre hman lo.

Toffees hian striker Romelu Lukaku chu pound maktaduai 75 zeta Manchester United hnena an hralh avangin bazar nan pawisa an ngah a, midfielder Davy Klaassen (£23.6m), centre-back Michael Keane (£30m) leh goalkeeper Jordan Pickford (£30m) te bakah Wayne Rooney chu free transfer-in an lalet tawh bawk.