SAFF U15 khel tur Mizo pali

South Asian Football Federation Under 15 Championships khel tur India U16 team chuan nimin khan Nepal an pan a, player 23 awmna India squad-ah hian Mizo naupang pali goalkeeper Lalbiakhlua Jongte, defender Lalrokima leh midfielder pahnih Lalchhanhima Sailo leh Eric Remruatpuia Chhangte te an tel.

SAFF U15 Championships hi U16 puala inelna a ni a, mah se a tel tur ram tam zawkin 2018 AFC U16 Championship qualification khel tura inpuahchah nan U15 squad an hruai ṭhin avangin U16 inelnaah a hming hi thlak a ni.

August 18 - August 27 thleng khelh tur inelnaah hian SAFF hnuaia ram paruk Bangladesh, Bhutan, India, Nepal, Sri Lanka leh Maldives-te an inel dawn a, group pahnihah team pathum ve ve awmin ṭhen hran an ni - a sang pahnihin semifinal an lut ang.

India hi Group B-ah awmin Maldives leh a thlengtu Nepal-te nen an awm ho a, match hmasa ber hi August 19-ah Maldives nen an khel ang.