Kerala-ah Wes Brown; Berbatov pawh a hnai?

Manchester United defender hlui Wes Brown chuan Indian Super League khel turin Kerala Blasters a zawm - hetah hian a la tawp lo cheu, South Indian club hian Bulgarian striker ropui Dimitar Berbatov chu inremna an neihpui tawh nia tarlan a ni bawk.

Kerala Blasters hian August 15 tlai khan Brown an lakluh thu hi an puang a, United defender hlui hian twitter lamah India a kal tur thu a tarlang ve bawk - Berbatov chungchangah erawh thuchhuah an la siam lo a, he thuziak i chhiar meuh chuan Blasters player a ni fel der tawh hial mai thei. Blasters hian coach atan Manchester United assistant manager Rene Meulensteen an lalut a, Dutch coach hi a player hlui pahnih an dawrna kawngah a thawh hlawk hle.

Brown sulhnu

England tana match 23 khel thei Brown hian Manchester United tan a khelh laiin match 362 a inlan sakah goal nga a khung a, Premier League (5), FA Cup (2), League Cup (2) leh Champions League (2) nomawi chawipuiin a hlawhtling hle. United youth system chhuak niin Jimmy Murphy Academy Player of the Year-ah ṭum hnih thlan a ni.

2000-01 season-a PFA Premier League Team of the Year-a lang phak defender chuan, "Khawvela fans nei ṭha ber pawl club tana khelh hlan ka nghakhlel a, Kerala kan inhmu thuai dawn nia," tiin Blasters a zawm tur thu hi twitter lamah a ziak. Brown hian United a chhuahsan hnuah Sunderland leh Blackburn Rovers tan a khel a, Championship club Rovers hi League One lama a tlak thlakpui hnuin India lam a rawn hawi ta.

Berbatov a hnai

Tottenham Hotspur striker hlui Dimitar Berbatov-a'n a thu phungin Blasters hi inremna a neihpui tawh a, he thuziah a nih laia an hmabak chu contract ziah chiah a ni tawh. Kum 36 mi striker hian CSKA Sofia, Bayer Leverkusen, Fulham, Monaco leh PAOK tan pawha lo khel tawhin tawnhriat a ngah tawh hle.

Bulgaria tana goal khung hnem ber niin match 78-a khelhah goal 48 a khung a, Bulgarian Footballer of the Year (7) ni ngun ber a ni bawk. United tan a khelh laiin Premier League (2) leh League Cup (1) ah a champion a, Monaco, Spurs leh Fulham-ah club Player of the year a ni vek thei bawk. 2010-11 season-ah khan Premier League top scorer a ni a, team of the year-ah ṭum hnih a lang.