Everton-in Rooney an kawl

Europa League khel tur zawnna playoff match tam zawk chu zanin hian khelh a ni dawn. Everton-in zanin dar 12:35 hian Hajduk Split an hmachhawn ang a, Premier League club hian Europa League-a Manchester United cham­pion puitu zinga mi Wayne Rooney an kawl avangin inringtawkna an ngah sawt ang.

Playoff inkhel dangah sea­son liam ta finalist Ajax-in Norwegian club Rosenborg an hmachhawn ang a, club hlun leh sum hmang tam Milan-in Republic of Macedonia club KF Shkendija an hmachhawn bawk ang.

Danglamna Rooney

Everton-in league match hmasa berah Stoke City chu Wayne Rooney goal hmangin an hneh a, tawnhriat nei ṭha English striker hian tun season Toffees hmel hmang a tidanglam.

Kum 31 mi striker Rooney hian season liam taa Europa League a champion hma hian Premier League title panga a la tawh a, Champions League-ah a champion tawh bawk. Kum 2009-10 season-ah phei kha chuan Football Writers’ Association leh PFA Players’ Player of the Year chawimawina a dawng kawp.

Everton hian 1986-87 season hnuah league nomawi an chawi lo a, Europe-a an champion hnuhnun ber pawh 1984-85 season daih tawh kha niin European Cup Winners' Cup-ah an champion. Tunah chuan Toffees hian champion zia an kal pel tawh a, hei vang hian Rooney anga tawnhriat nei ṭha hi an mamawh an ni.

Toffees defender Phil Jagiel­ka chuan, "Wayne hian nomawi tam tak a chawi tawh a, kan bula a rawn kal thei hi a lawmawm a ni. Chawlh tumin kan hneh hi a rawn pan lo a, kan team tichak turin a rawn haw a ni. Ani hi chu khelmual leh a pawnah pawh hruaitu a ni," tiin Rooney a fak.

Koeman-a'n a la thutak

Everton hian Playoff thleng turin Slovakia club MFK Ru­zom­berok chu an mual leh khualmualah 1-0 ve vein an hneh a, aggregate-ah 2-0 in an chak.

Hajduk Split nena an inkhelh tur chungchang sawiin Ronald Koeman chuan,"Hajduk Split hi elpui tham an ni a, entu mipui puihna nen theithawp chhuahin kan khel ang. Group stage thlen ngei kan duh avangin an chakna leh chak lohna kan hriatchian a ṭul a ni," tiin Europa League group stage khelh ngei a tum thu a sawi.

Everton hian Goodison Park-ah Croatian club hi an mikhual phawt ang a, August 24 zanah mipui 35,000 lenna stadium Stadion Poljud-ah second leg an khel leh ang.

Finalist Ajax

Ajax-in Europa League final-ah Manchester United an hneh lo a, hei vang hian Champions League khelh theihna hun ṭha an bawhpelh a, Europa League group stage khel leh tur pawhin Rosenborg an hneh a ṭul.

Dutch club leh Rosenborg te hi 2002-03 UEFA Champions League group stage-ah an awm dun a, Trondheim-ah goal awm loin an inhnehtawk a, Amsterdam-ah 1-1 in an inhnehtawk leh bawk.

Red & black derby

AC Milan-in an jersey dum leh sen an lar pui a, hetiang rawng tho hi Shkendija hian an ha ve bawk.

Milan hi Ros­soneri tihin an ko ṭhin a, 'Red & Black' tihna a ni. Shkendija hi 'Kuq e Zi' tihin an sawi ṭhin a, 'Red & Black' tihna tho a ni. Koh dan inang ni mah se sulhnuah erawh Italian club an chungnung a, Milan hian Macedonian club vawi riat an hmachhawn tawhah chak loh an la nei lo a, vawi ruk an chak.

Zanin hian San Siro-ah Milan-in hnehna an chang zo lo a nih chuan result mak tih theih tur a ni ang. Milan hian tun nipui transfer chhungin player thar 10 chuang an lalut tawh.

Team 48

Europa League group stage-ah team 16 an tling tawh a, chungte chu Arsenal (England), Lyon (France), Villarreal (Spain), Lazio (Italy), Real Sociedad (Spain), Lokomotiv Moscow (Russia), Hertha BSC (Germany), FC Cologne (Germany), Vitoria Guimaraes (Portugal), Atalanta (Italy), Zulte Waregem (Belgium), Zorya Luhansk (Ukraine), Konyaspor (Turkey), Vitesse (Netherlands), Fastav Zlín (Czech Republic) leh Lugano (Switzerland) te an ni.

Group stage-ah hian team 48 an awm dawn a, playoff-ah hian match 22 awmin team 22 an tling dawn tihna a ni. Hei bakah hian Champions League playoff round aṭanga chak lo zawk team 10-in Europa League group stage hi an khel dawn bawk.