Galatasaray player thar Feghouli

Turkish club ṭha Galatasaray chuan West Ham winger Sofiane Feghouli chu pound maktaduai 5.01 a an lakluh thu an puang a, kum nga chhung an hnena khel turin contract an ziahpui. Kum 27 mi winger hian season hmasa ṭan dawn khan Hammers a zawm a, kum thum cham turin contract ziak mah se kum khat hnuah a chhuahsan leh tak zawk a ni.

Feghouli hian season hman zawh takah khan Spurs tan hian match 27 khelin goal li a khung a, Hammers khelmual thar London Stadium-a West Ham match hmasa bera NK Domzale nen Europa League match-a an inhmachhawn ṭumin goal a khung bawk.

Kum bithliah inelnaah France tan inlan mah se a puitlin hnuah an ram Algeria senior team tana inlan a thlang zawk a, World Cup 2014-ah khan Belgium lakah penalty hmanga goal khungin kum 28 hnua World Cup-a an ramin goal an khung leh hmasak ber a ni hial.

Valencia aṭanga Ham­mers a pan hnua Turkey pan tur winger chuan, "West Ham fan-ten min ṭawiawmnaah khan lawm­thu ka sawi a, in hmalam hun atan duhsakna ka hlan che u a ni," tiin a club hlui hi a mangṭha.