Spanish Super Cup champion 'Super' Real

Real Madrid chuan Spa­nish Super Cup nomawi chawi turin Barcelona 2-0 in an hneh - inkhel hmasa nena belhkhawmin Zinedine Zidane-a naute chakna zat hi 5-1 a ni a, season ṭanna El Cla­si­co-ah Real Madrid an ropui.

Nou Camp-ah club pahnih an intawn hmasak ṭumin Real-in 3-1 in hnehna an chang tawh a, Santiago Bernabeu-a inkhel leh tur ni mah se hrem vanga Cristiano Ronaldo an chhawr theih dawn loh avangin chak chiang saa dah an harsa - mahse, Real-in Portuguese forward tel lo pawha an ṭhat tawkna an pholang a, Marco Asensio leh Karim Benzema goal hmangin Barca an hnuaichhiah.

Ronaldo a ngai lo!
Hrem vanga inlan thei lo Ronaldo-a'n mipui zing aṭangin inkhel a en a, chiang taka a hmuh theih erawh a tel lo pawhin Real Madrid an ṭha tawk tih hi a ni - Portugal captain tel loin Real-in Barcelona an ngam a, Catalan club an che hleithei lo.

Zinedine Zidane-a'n Ronal­do chhawr thei lo mah se kartawp La Liga an inkhel tur ngaihtuah ran chungin Isco leh Gareth Bale te bench-ah a la dah cheu a, Nou Camp-a goal khung tawhtu Asensio-a'n hming chher nan a hmang - kum 21 mi attacking midfielder hian minute linaah goal ropui a khung a, Barca keeper Marc-Andre ter Stegen-a'n che loin goal lut lai hi a en liam.

Benzema a 'cial
Real Madrid-in goal an khung hnuah Barcelona an nawr chhunzawm a, Real player-te khel a hmuhnawm takzet. Minute 39-naah Real-in an thawhrim rah an seng a, an goal hnihna an khung - Real goal hnihna lut tur hian mual vei lam sirah Marcelo chuan chak taka ball tlan luh puiin box chhungah ball a thlawh phei a, Benzema-a'n amah vengtu Samuel Umtiti mawi zeta bum chungin 'two-touch' hmangin a khung.

Santiago Bernabeu-ah hrem vanga match hmasa khel thei lo Luka Modric a inlan bawk a, Croatian midfielder hi game siamtu ber niin Barcelona midfield-in an ngam lo - Real chak chhana fak phu ber erawh Zinedine Zidane a ni a, French manager hian kum hnih pawh a enkawl tlin hmain Spanish club hi Champions League (2) leh La Liga-ah a champion pui der tawh.

Barca an buai?
Barcelona-in Neymar an hralh hnuah competitive match hnih an khel a, goal khat chiah an khung. Pound maktaduai 200 man forward thlak turin Barca-in Philippe Coutinho leh Ousmane Dembele beisei mah se an beiseina erawh a la hlawhtling thei lo a, Neymar thlaktu an mamawh zia chiang takin a lang nawn.

Chutihrualin Neymar awm loh vanga chak lo pumhluma Barca puh erawh a fuh lo a, Brazil captain tel lo pawhin Lionel Messi leh Luis Suarez an la nei tih hriat a ṭha - tuna zawhna awm ber zawk chu Luis Enrique-a hmun ruak luahtu Ernesto Valverde hian beisei a phak dawn lo em ni? tih hi a ni a, tun ang renga a naute a hruai a nih ngat chuan Nou Camp-ah rei tak kan hmu lo ang.

An la kim lo
Barcelona-in inkhel pahnih belhkhawma 5-1 ngawta Real Madrid an hneh lohnaah chhuanlam an neih theih pakhat chu 'kan ṭhat dan ber kan la ni lo' tih hi a ni. Club captain Andres Iniesta chu hliam vangin chawlh pek a la ni rih a, Spanish midfielder hi kum 33 lai ni tawh mah se a awmna 'team' chu team dang daih an ni ṭhin tih chu hriat sa a ni.

Pound maktaduai 36 man Paulinho-a'n Barca kawr a la ha thei rih lo bawk. Hetihrual hian Real elphak an duh takzet a nih chuan sawi hlawh ber Neymar hmun ruak luahtu tur erawh Barcelona-in an lak ngei a ṭul - chuti a nih loh chuan Pep Guardiola enkawlna hnuaia Barca, Real Madrid-in an ngam ngai lo ang chiah khan Zidane-a enkawl Real hi Barca-in season tluanin an 'u' en ngei a rinawm.

Eng nge an sawi?
Barcelona tan Messi-a'n bar a pet per a, Suarez-a'n post a pet per bawk. Catalan club coach Valverde chuan, "Goal khung theihna hun ṭha kan nei a, mah se kan khung si lo. Kan rilru a hnual lutuk tur a ni lo a, kan hma lawkah La Liga in min hmuah avangin kan in thin harh vat a ṭul a ni. Spanish Super Cup nomawi chawi ngei kan duh a, mah se tunah chuan tih theih kan nei tawh lo. Theihtawp chhuaha insiamṭhat hi kan tihtur chu a ni," a ti.

Real-in season ṭan tirah nomawi pahnih an chawi leh der tawh - UEFA Super Cup-ah Manchester United hnehin an champion a, Barca hnehin Spanish Super Cup an chawi leh ta. Real boss Zidane chuan, "Team ṭha tak pahnih lakah nomawi pahnih kan hlawh chhuak leh der ta. Mahse, Barca nen hian kan inthlau ta duai tihna a ni lo. La Liga-ah kan inum leh dawn a, a harsa dawn a ni," a ti a, a ṭawng uang duh lo.

Tute nge inlan?
Real Madrid : Navas, Carvajal, Ramos, Varane, Marcelo, Modric, Kovacic (Casemiro 62), Kroos (Ceballos 80), Vazquez, Benzema, Asensio (Theo Hernandez 75).
Barcelona : Ter Stegen, Pique (Semedo 50), Mascherano, Umtiti, Roberto, Alba (Digne 78), Gomes (Deulofeu 72), Busquets, Rakitic, Messi, Luis Suarez.