Chelsea-ah ka kir dawn lo - Costa

Diego Costa chuan Chelsea-ah kir a tum loh thu a sawi a, hetihrual hian Atletico Madrid chu kir a duhna club a nih thu a sawi nawn bawk. Kum 28 mi striker hian Premier League-a Chelsea a champion pui hnuah manager Antonio Conte chuan season thar atana a ruahmannaah a tel loh thu text message hmangin a hrilh a, hemi hnuah hian club leh Costa inkar a ṭha leh tawh lo.

Spain international hi tun hnaiah club training zawm tura tih ni mah se a zawm loh tur thu a sawi a, Chelsea chu amah duh si loa a chhuahna kawng dalah a puh. Costa thusawi hnu lawkah Chelsea-in Brazil a chawlh hmang mek striker hi club training zawm turin thu an pe chhunzawm a, Costa-a'n a zawm loh tur thuin a chhang leh ta.

Costa chuan, "Mana­ger-in min duh lo a nih chuan Atletico Madrid-a kir ka duh thu hi ka sawi chiang tawh a, sawmna dang pawh ka hnar zel. China emaw club dang, ka man atana sum insen huai tak hnenah min hralh an tum a, mah se ka chhuak dawn a nih chuan ka duhna tak club ka pan ang," tiin a luhlul hle.

Season hmasaa league goal 20 khungtu striker chuan, "Atletico hi tun thlaah ngei zawm hman ka duh a, he club-a train a, World Cup hmaa inpeih hman ka duh. Diego Simeone-a'n min duh a, chu chu a chiang em em. Ani bakah fan-te nen kan inpawhna a ṭha em em a, Atletico mipuite hian min hmangaihin min zah a ni. Footballer ka nihna piah lamah mi pangngai tak angin anni chuan min enkawl a ni," tiin a club hlui a ngai hle.

Chelsea hian Costa hi a kir duh loh avangin £300,000 an chawitir tawh a, Atletico Madrid chuan £150,000 an pek sak dawn nia sawi a ni.