West Brom-in City an hnar

Manchester City chuan Jonny Evans lakluh tumin West Brom dawr mah se Baggies chuan an captain hi zawrh lai a nih loh thuin an lo chhang a, pound maktaduai 18-a City dawrna chu an hnawl.

City leh Baggies hian kar hnih chhung zet chu indawrna hi an lo kalpui tawh a, mah se West Brom hian City dawrna chu hetih chhung hian vawi hnih zet an hnar hman - Leicester City chuan Northern Ireland international lakluh tum hian Baggies hi pound maktaduai 10-in an dawr ve bawk a, Foxes dawrna pawh hi hnawl a ni.

Evans hian sikul nau­pang a nih laiin Manchester United a zawm a, Old Trafford-ah kum kua hun a hman chhungin Premier League (3) leh League Cup (2) nomawi a chawipui. Red Devils tan match 198 ngawt a inlan hnuah a hunlaia United boss Louis van Gaal chuan a ruahmannaah a tel ve loh thu a hrilh avangin kum 2015 khan Baggies hi a pan a, kum hnih cham turin contract a la nei.

Season hmasa ṭan dawn khan Arsenal chuan kum 29 mi defender hi lakluh tumin an lo dawr tawh bawk a, West Brom hian an lo hnar tawh. City manager Pep Guardiola-a'n thla hmasa khan central defender a la mamawh belh thu a lo sawi tawh a, Evans hi a dawr nawn a nih pawhin a mak lo ang.