Nomawi pahnih chawi tawh Chhinga Veng

Chhinga Veng FC hian coach Lalsangzuala Hmar hnuaiah MFA Super Cup leh I Day Football nomawi an chawi a, match 12 chhung an chak zawn tawh. August 31 aṭanga ṭan tur Mizoram Premier League-ah pawh Chhingcows hi champion tura rinkai an ni.

Team thar

Chhingcows hian season liam ta khan a vawi khat nan MPL an khel a, vawi 15 khelh tur awmah vawi li an chak a, hetiang zat bawk hi an chak lo. An season khatnaah vawi ruk zet an chak loh avangin semifinal an lut pha lo a, Chhinga Vengin palina Chanmari West an phak lohna zat hi point nga a tlin laiin parukna Dinthar FC nen an point hmuh zat a inang.

Nikum kum tawp lamah season thar an thlir tawh a, MPL-a Chanmari FC champion puitu coach Sanga an be fel a, Santosh Trophy-a Mizoram coach an hmin theih avang leh club thuneituten squad thar lakna tur atan budget ṭhahnem tak an dah avangin an player it zawng an hlah lo.

Chhinga Veng player lakluh zingah Chanmari FC aṭanga captain Lalrinchhana, midfielder ṭha bik R. Malsawmltuanga leh MPL5 best player Malsawmfela an lalut thei chu an tihfuh ber zinga mi a ni a, tualchhung transfer lak theih hun tawp lama MPL5 top scorer Laldampuia an chang thei chu an vannei tel bawk.

Thawhrimna leh hlawhtlinna

Chhingcows-in squad an neih ṭhat avangin tun season-a inelna hmasa ber MFA Super Cup-ah pawh champion rinkai an ni a, an fixture a fuh bawk avangin insiamremna hun ṭha an nei bawk.

Chhinga Veng hian Zarkawt FC (9-0), Zo Dreams (14-0) leh Chawnpui FC (14-2) lakah zahngaihna an lantir lo a, quarterfinal-a Bethlehem Vengthlang FC (2-1) leh semifinal-a Venghlui FC (3-2) an hneh ṭumin vanneihna mamawh mah se final-ah Chanmari West (5-0) an sawp a, an chungnung tih zep rual a ni lo.

Sanga hian a player neih ṭhat a hmang thiam a, best forward Malsawmfela leh best midfielder R. Malsawmtluanga ten an vanglai hun an hman ṭha leh a, player-te an fakawm rualin thiam taka chhawrtu coach hnathawh hmuh hmaih a thiang lo.

I Day Football-ah MPL club pariat bakah state pawn team hnih an tel a, Chhinga Veng hi champion rinkai ni chhunzawm mah se kawng harsa zawk an paltlang a ṭul tawh.

Amaherawhchu Sanga hote hian MPL club pawh club naran ang maiin an hmachhawn a, an hmaa ding apiang an sawp emaw tih mai tur a ni. Chhingcows hian group stage-ah Chanmari West (5-1), Mizoram Police (5-2), Chanmari FC (5-1) leh Rhino Charge (6-1) te lakah goal nga an khung tling vek.

Semifinal-a Bethlehem Vengthlang FC nena an inkhelh ṭumin ruah nasa takin a sur a, awmze neia an khelh theih loh ṭumah pawh 2-1 in hnehna an chang tho. Hei chauh hi a ni lo a, final-ah Chanmari FC lakah goal an chhuah hmasa zet a, Chhingcows hian an huaisenna pholanna hunah hmangin 2-1 in an lehthal.

Treble champion?

Chhinga Veng hian MPL an champion leh a nih chuan season khata nomawi chawi theih pathum chu an hui vek dawn tihna a ni a, Mizo club zingah 'treble champion' thei an la awm lo.

Vawi 12 chak zawn tawh Chhingcows tan MPL champion hi thil theih a ni a, amaherawhchu a awlsam dawn lo. Season liam ta khan Aizawl FC chuan MFA Super Cup leh I Day Football nomawi an chawi hnuah MPL-ah pathumna an ni pha chauh a, final an thleng pha lo.

A êng zawnga thlir erawh chuan Chhinga Veng hian Aizawl FC ang lo takin hnehsawh takin inelna pahnihah hian nomawi an la a, tualchhung player an nei ṭha tawh a, squad thuam chak a la ṭul cheu a nih pawhin foreign player la thei tur an ni.