Round hnihnaah Mayweather ka hneh dawn - McGregor

Nevada State Athletic Commission (NAC) chuan Conor McGregor leh Floyd Mayweather Jr inhnek turah glove zang zawk 8oz (226 gram) hman an remti a, UFC champion McGregor chuan glove zang zawk an hman dawn avangin Mayweather chu round hnihna lekah a hnek thluk tur thu a sawi.

Boxer pahnih inhnek­na tur weight hi 154lbs (69 kg) chunglam a nih avangin a zang berah glove 10oz (283 gram) hman tur a ni a, mah se Mayweather-a'n 8oz hman a dilna chu ngaih­tuah niin NAC hian he inhnek bik atan hian rem a tihsak ta a ni.

McGregor chuan, "Glove zang zawk hman an phal ta bawk a, Mayweather hian round hnih aia tam a khelh thlen theih ka ring lo. Round 12 hmachhawn turin ka inpeih a, chuhtihrualin second rei lote chhunga tukdawl turin ka inbuatsaih bawk," tiin a inring tawh hle.

UFC lightweight champion hi tun hnaiah boxing legend ten boxing ring rap tura a skill-in a phak loh thu leh Mayweather hmaah a din rei theih an rin loh thu an sawi a, Irish fighter chuan amah ringhleltute chhangletin, "Ka thiamna leh theihna ringhlela ka chungchang thu an sawi avang hian ka phur sawt a, khawvel hmaah hian martial art hi eng ang tak nge a nih pholan ka tum a ni," a ti.

McGregor-a'n Mayweather a hma­chhawnna aṭangin dollar maktaduai 100 vel a hlawh chhuak thei dawn a, UFC fan-ten a lar chhuahna lamah a kir leh loh an hlau hle. Mahse, kum 29 mi fighter chuan UFC-ah a kir leh ngei tur thu a sawi a, Mayweather-a'n MMA rules hnuaiah rematch a duh thu a sawi chungchangah, "A thusawi hi a ti hlawhtling a nih chuan ka zah khawp ang," tiin a sawi bawk.