Everton player manto ber Gylfi Sigurdsson

Nipui bazara che na tak Everton chuan an player lakluh manto ber ni turin midfielder Gylfi Sigurdsson chu Swansea City aṭangin pound maktaduai 45-in an lalut ta. Iceland international hian Goodison Park-ah kum nga daih contract a ziak a, chawlhkar khatah £100,000 a hlawh ang.

Kum 28 mi Sigurdsson hian Nilaini khan medical test a paltlang a, kum 2014-a Everton player manto ber Romelu Lukaku (£31.8m) chu a rawn khum ta a ni. Belgian striker Lukaku hian tun nipui chhungin Manchester United a pan san tawh thung.

Toffees tana contract a ziah hnuah Sigurdsson chuan, "Season hmasa lama ka lo tih tawh ang bawkin ka club thar tan hian goal khung bakah ṭhiante khung tur siamsak hna ka thawh chhunzawm theih ka beisei," a ti. Sigurdsson hian season hmasa khan Swans tan Premier League-ah goal kua a khung bakah assists vawi 13 a nei bawk.

Sigurdsson chuan sawi chhun­zawmin, "Everton hian hmasawn an tum a, table chunglam luahtu nih ngei pawh an tum. Hei vang hian an hnenah ka kal, season tluanin result ṭha tak neih kan tum dawn a ni," tiin a club tharah beiseina a neih san thu a sawi.

Everton manager Ronald Koeman chuan, "Hun a duh rei hle, mahse a tawpah chuan kan mi duh kan lalut ta. Ka ngaihdan chuan a position bikah chuan Premier League player ṭha ber a ni, a khelhna hmuna khel thei sa kan nei a, kan squad a chhah sawt dawn tihna a ni," a ti.

Koeman hian July thla khan Sigurdsson lakluh tumin pound maktaduai 40 vel hum chungin Swans hi an lo dawr tawh a, an hnar sak. Everton bakah Leicester City-in lakluh tuma an dawr ve bawk avangin induh thei dinhmunah an ding, a tawpah erawh sum hmang huai Toffees-in an player duh an chang ta a ni.

Pound maktaduai 131

Dutch manager Koeman-a'n tun nipui trasfer bazar-ah player thar lakluh nan pound makaduai 131 zet an seng tawh a, Merseyside club hian table laihawl ni loin a chunglam luah an tum ang - champion an tum ngam a nih pawhin a mak hran lo thei bawk.

England leh Manchester United tana goal khung hnem ber fapa tlanbo Wayne Rooney an hruai kir leh tawh a, tlarhnung lam ti chak turin centre-back Michael Keane leh goalkeeper Jordan Pickford te lakluh nan pound maktaduai 30 ve ve an seng bawk.

Ajax midfielder Davy Klaassen (£23.6m) leh striker Sandro Ramirez (£5.2m) te an lei tawh bawk a, hetih lai hian season hmasa lama an player pawimawh ni phak midfielder Ross Barkley erawh chhuak tura ngaih a ni a, veteran Gareth Barry a chhuak tawh bawk. England international Barkley hi hliam vangin a chawl mek a, season bul a la ṭan ve lo.

Kum 54 mi Koeman chuan, "Striker kan la mamawh belh, Romelu Lukaku kan chan a, hetih lai hian Wayne Rooney leh Sandro Ramirez te bakah Gylfi kan neih belh thung. Mi tamtak chuan heng kan player pathumte hian goal an khung thei tawk turah an ngai. Mahse, Premier League bakah European football khelh kan duh a, hei vang hian jersey number 9 ha thei tur kan la mamawh a ni," tiin a sawi.

Merseyside club hian hian thla hmasa lam khan Arsenal striker Olivier Giroud an ngaih­­­ven thu an sawi tawh a, amaherawhchu France international hian Emirates Stadium chhuahsan tumna a neih loh avangin khaw dang an hawi a ṭul dawn niin a lang.

Everton hian khawi posi­tion-ah pawh khawvela a ṭha berte zinga mi tia sawi tur chu an nei lo a ni mai thei. Mahse, player vangtlang chunglam an kawl khawm hnem ta hle, manager fing tak Koeman kaihhruaina hnuaiah Big Four club chhaih buai phak tura ngaih an ni.