Thutlukna dik lo a ni - Ronaldo

Real Madrid forward Cristiano Ronaldo chuan Spanish Super Cup-a a chet dan avanga match nga khel thei lo tura an hremna chu 'inhmuhsitna' a nih thu a sawi. Kum 32 mi forward hian Spanish Super Cup first leg-ah Barcelona nen an inkhelh ṭumin red card a hmu a, a lungawi lo hian referee a nam.

Nou Camp-a inkhelah hian Ronaldo hian a goal khung lawm nana a kawr a phelh avangin yellow card a hmu a, a hnu minute hnih lawkah penalty beiseia a dive (?) avangin a yellow card pahnihna pek a ni a, hnawhchhuah a ni.

Ronaldo-a'n ngawi rengin khelmual chhuahsan ni se chuan buaina pumpelh tur a ni a, mah se Portugal captain hian a lungawi lohna lantirin a chhuak tur chuan referee a nam. He inkhel thununtu Ricardo de Burgos Bengoetxea chuan match report-ah, "Red card ka pek khan, Ronaldo lungawi lo hian min nam a ni," tiin a ziak a, Ronaldo-a'n hremna a tawrh phah.

Portuguese forward a lungawi thei ngang lo a, instagram lamah a lungawi loh thu a pholang. Manchester United forward hlui chuan, "Thutlukna dik lo tak a ni a, hei hi a ni inhmuhsitna chu," tiin a chunga Spanish FA chet dan chu a dem hle - Ronaldo hian September 20-a Real Betis an hmachhawn hma chu Spanish football-ah a hmel a lan thei lo ang.