Hnehna nena bul ṭantu Nadal

Rafael Nadal chuan Cincinnati Open third round lut turin harstana a tawk lo. Spain tlangval hian Nilaini zan khan a match hmasa ber kelin Richard Gasquet chu 6-3, 6-4 in a hneh.

Hard court tournament khelh mekah hian Roger Federer chu hliam vanga a inlan theih loh avangin karleha world ranking chhuak tharah chuan Nadal hi pakhatna a ni ang.

Second round inkhel dangah Alexander Zverev erawh American rawlthar Francis Tiafoe lakah 6-4, 3-6, 4-6 in a chak lo. Ger­man rawlthar duhawm Zverev hi tun hnaiah a che ṭha a, Washington leh Montreal nomawi chawi zo chiahin Cincinnati Open a khel a. Mahse a zawna match 10 chhung a chak ta chu a tawp ta rih a ni.

Kum 20 mi Zverev chuan, "Khawl ka ni bik lo, mihring ka nih avangin ka chauh thei ve tho, tunah hian ka chau hle a ni. He inkhel hi theihnghilh ka duh, chutihrualin thil tam tak ka zir chhuak thung," tiin a sawi.

Inkhel dangah Grigor Dimitrov chuan kumina match 30 a chakna ni turin Spain tlangval Feliciano Lopez chu 7-6 (7-5), 6-4 in a hneh a, third round-ah chuan Juan Martin del Potro nen an inhmachhawn ang - Del Potro hian Mitchell Krueger 6-4, 6-4 in a hneh ve thung.