Stoke hmachhawn lo tur Sanchez

Arsenal manager Arsene Wenger chuan a forward Alexis Sanchez chu Inrinni zana Stoke City hmachhawn tur squad-ah a la tel loh tur thu a sawi a, defender Shkodran Mustafi leh midfielder Francis Coquelin te erawh Premier League khel turin an inpeih tawh.

Chile international Sanchez-a'n team training a zawm pumhlum tawh a, an match hmasa bera Leicester City an hneh ṭumin 'a la inpeih lo' tiin a khelhtir lo. Stoke a hmachhawn loh tur chhan pawh 'a remchang rih lo' tih bakin a sawi lo.

Gunners manager Wenger chuan, "Sanchez hi Stoke hma­chhawn turin a remchang rih lo, Mustafi leh Coquelin te erawh squad-ah an awm ang," a ti. Sanchez-a contract chungchangah thuthar a awm loh thu a sawi tel bawk.

Premier League manager zinga tun dinhmuna mahni hna ngai chelh rei ber Wenger chuan sawi chhunzawmin, "Sanchez hian season khat bak contract a nei tawh lo tih kan hria, a chanchin thar ber chu tunah hian season bulṭan ve turin a inbuatsaih mek a ni," a ti.

Barcelona forward hlui Sanchez hian Emirates Stadium-ah season khat daih bak contract a nei tawh lo a, tun thlenga a la pawh sei loh avangin a hma hun tur hi football bazar titi tui tak pakhat a tling. Kum 28 mi Sanchez hian an ram tan Confederation Cup a khelh avangin player dang aiin chawlh pek rei bik a ni. London-a a kir hnuah pawh a hma hunah thu chiang a awm theih mai loh avangin Gunners fan-te mut a ti tui thei rih lo.

Arsenal player zingah Sanchez bakah Mesut Ozil, Alex Oxlade-Chamberlain leh Jack Wilshere ten season khat daih bak contract an nei tawh lo, manager Wenger tan hna thawh tur a tam hle.

England international Cham­berlain hi Premier League champion Chelsea chuan lakluh an duh a, season hmasa lama loan hmanga an chhuahtir tawh Wilshere pawh a khelh phakna tur hmun zawng tur anga sawi a ni bawk.

French manager Wenger chuan, "Chamberlain hi a chhuak lo ang, rei lote hnuah ani hi English player ṭha berte zinga mi a ni dawn a ni," tiin a sawi. Wenger hian midfielder Jack Wilshere inkhel ve leh thei ta chu a lawm thu a sawi a, "Chhawr theih tura a awm leh ta hi a lawmawm hle, a theihna sang tak ang kha pho chhuak tur erawh chuan hun a la mamawh deuh ang," tiin a sawi.