Celtic-in Champions League khel dawn?
Scottish club Celtic-in Champions League playoff first leg-ah Kazakhstan champion Astana 5-0 in an sawp a, group stage tling turin an dinhmun a ṭha hle. Nilaini zan inkhel dangah Sevilla, Napoli, Olympiakos leh Hapoel Beer-Sheva ten hnehna an chang bawk.
Second leg hi August 22, Thawhlehni zanah khelh leh tur a ni a, August 24 zan dar 10:30 hian Grimaldi Forum, Monaco-ah group stage-a intum tur pawhna neih a ni ang.
Record siamtu Celtic
Celtic-in Champions League playoff-a mahni muala chak chiang ber record an siam. Season liam ta khan playoff-ah Manchester City-in Steaua Bucharest chu 5-0 in an sawp a, Borussia Monchengladbach-in Young Boys 6-1 in an sawp bawk. English club leh German club hian khualmualah ve ve hnehna hi an chang.
Parkhead-ah Australian midfielder Tom Rogic cross chu Astana player Evgeni Postnikov-a'n a lamah a tilut a, he goal hi minute 32-na niin Scottich club an hawi kir tawh lo. Scott Sinclair-a'n hun chanve hma lam leh hnu lamah goal khat ve ve Celtic tan a khung a, James Forrest-a'n goal lina khungin minute 88-naa Leigh Griffiths ball pet chu Astana defender Igor Shitov-a'n dang perin mualneituin goal nga an khung.
Celtic manager Brendan Rodgers chuan, "Chak tumin kan khel a, chet ṭhat kan duh. Duhthusama ṭhain kan khel a, tunah chuan a tawp khar tura zinchhuah chiah kan mamawh ta," tiin a khelh danah a lungawi thu a sawi.
Scottish club hian Champions League khelh duhin Rodgers an lalut a, Liverpool manager hian season khatnaah Europe-a football inelna sang ber a thlenpui tawh a, season hnihnaah pawh a thlen pui leh ngei dawn niin a lang. Northern Irish manager hian Celtic-a a season hmasa berah Scottish Premiership, Scottish Cup leh Scottish League Cup-ah a champion pui vek.
Inkhel dang
Italian club Napoli-in Dries Mertens leh Jorginho te goal hmangin French club Nice 2-0 in an hneh. Belgian forward Mertens hian minute 13-na lekah Nice goalkeeper Yoann Cardinale bumin goal hmahruai a khung. Mertens hian minute 70-naah French defender Christophe Jallet lakah penalty hlawh chhuakin Jorginho-a'n goal-ah a chantir.
French club hian inhliam vangin Mario Balotelli an chhawr thei lo a, an player thar Wesley Sneijder chu inkhel turin a fitness a la ṭha lo bawk.
Sevilla-in minute 84-naa Wissam Ben-Yedder goal hmangin Istanbul Basaksehir 2-1 in an hneh hram. Khualmualah Spanish club tan Sergio Escudero chuan minute 16-naah goal hmahruai a khung a, Turkish club tan Southampton leh Juventus winger hlui Eljero Elia chuan minute 64-naah an siphurh a sut a, amaherawhchu mualneitu lam hi an ṭangtluan thei lo.
Olympiakos pawhin Croatian club Rijeka 2-1 in an hneh hram a, Israeli club-in Hapoel Be'er Sheva-in Maribor 2-1 in an hneh a, an inthlauhna a la tam loh avangin la inlehthal thei vek an la ni.