Bul ṭanfuh a pawimawh - Srikanth

India badminton star Kidambi Srikanth chuan August 21 aṭanga khelh ṭan tur World Badminton Championship atan nomawi sawi a la hun lo a, a bul ṭan fuh phawt a pawimawh thu a sawi chhuak.

Kum 24 mi Srikanth hian kuminah Australian leh Indonesia Open nomawi a chawi tawh a, Singapore Open-ah pahnihna ni bawkin sulhnu a nei ṭha hle. Mah­se, Syed Modi Grand Prix Gold nomawi a humhim zawh loh bakah All England leh India Open-ah first round a paltlang lo.

World number 8 Srikanth chuan, "Ka khelh ṭhat tluan lai anih avangin inrintawkna ka nei a, chutihrualin khawvel huap inelna lian hmachhawn tur chuan player zawng zawngin theihtawp an chhuah dawn bakah an fitness a ṭha dawn tih a chiang, chuvangin kan thlen chin tur hriat lawk a ni lo," tiin a sawi.

Coach Pullela Gopichand-a kaihhruaina hnuaia khel tur Srikanth chuan sawi zawmin, "Inelna hautakah chuan 90% hi kan thawhrim rah a ni thei a, 10% erawh chu vanneihnain a ken tel a ngai. Eng inelna pawh nise a hmawr bawk ṭha tur chuan a bulṭan fuh a ngai a, chutiang ti tur chuan ka inbuatsaih bawk," tiin a sawi.

Kumin World Championship-ah hian Indian shuttler zingah Srikanth hi mipa singles lama hmachhuan tur a ni dawn a, hmeichhe singles lamah PV Sindhu leh Saina Nehwal te an awm bawk ang.