Charity match-ah United tan Bolt

IAAF World Championships-ah Usain Bolt a inhliam a, Jamaican sprinter hi a dam hman a nih chuan September 2-a Manchester United leh Barcelona legend te inkhelh hunah Red Devils tan a inlan ang.

Charity match aṭanga an sum hmuh hi Manchester United foun­dation hnenah hlan tur a ni a, kum 30 mi Bolt hi a dam hman a nih phawt chuan inlan ngei a duh nia sawi a ni. Jamaican sprinter hian Olympic-ah gold medal pariat a la a, 100m world record kawltu a ni bawk.

Bolt hian London Stadium-ah athletics-a a hun tawp a hmang a, gold medal nen ni loin inhliam chungin hun tawp a hmang. Hemi ṭum hian Bolt chuan, "Football khelh ka châk thu hi ka sawi fo a, ka ṭhatna ni tura beisei vang a ni. Tunah erawh ka malpui hliam vangin thil dang ngaihtuah thei ka ni lo," tiin football khelh a tui thu a sawi.

Intlansiaka sulhnu nei ṭha Bolt hian langsar takin Manchester United a ṭan a, hei vang hian United jersey hak theihna hun ṭha charity match kaltlanga inhawng hi bawhpelh a duh lo ang.