Lindelof chungah dawhtheih a ṭul - Mourinho

Manchester United-in nipui laia pound maktaduai 31-a an lakluh Victor Lindelof chu Jose Mourinho-a'n league match hmasa bera West Ham 4-0 a an sawp ṭumin squad-ah a telh lo a, Portuguese manager chuan Swede defender a chhawr loh chhan a sawifiah.

Mourinho chuan, "Ka ngaihdan chuan Real Madrid kha Victor-a tan a hma mah mah a, a khelh chhan chu Jones leh Bailly te an hrem vang a ni," tiin UEFA Super Cup-a Lindelof khelh chhan a sawi. Hammers an hneh ṭumin Phil Jones leh Eric Bailly ten inkhel bul an ṭan a, Chris Smalling chu bench-ah dah a ni.

Portuguese manager chuan sawi zauin, "Premier League khel tur hian ram hrang hrang aṭangin player ka lalut tawh a, a tlangpuiin an harsat. Kum 2004 khan Ricardo Carvalho chu Chelsea-ah ka lalut a, defender ṭha tak ni a, Premier League defender ṭha ber zinga mi ni zui mah se English league-a a khelh ṭantirh khan harsatna a tawk. Henrikh Mkhitaryan hi defender a ni lo a, chutihrualin season liam ta kha chuan hun a mamawh tih a lang," tiin English football kalphung a dan avangin khelh ṭhat nghal a har thu a sawi.

Kum 54 mi Mourinho chuan, "Lukaku leh Matic tan erawh a dang a, anni chu kum tam fe Premier League-a che ṭha tawh an ni. Victor chuan hun a mamawhin ka hria a, chuvangin a chungah pawh kan dawhtheih a ṭul ang," tiin pressure pek nat a tum loh thu a sawi.

United-in nipui laiin player pathum an lalut a, Romelu Lukaku-a'n league match hmasa berah goal hnih khung nghalin Nemanja Matic chu man of the match a thlan a ni. Mourinho hote hian Inrinni tlai dar 5:00 hian Swansea City hmachhawn turin Liberty Stadium an tlawh ang.