A ropuina nen Rafa a her liam

Rafael Nadal chu tun season atan Grand Slam-ah a vawi khat nan a chak lo. Spanish star hi Frances Tiafoe hneh loin US Open last 16 aṭangin a tla a, engtik hunah nge tennis a khelh chhunzawm leh dawn tih a sawi lawk thei lo.

Nimin zing inkhel dangah Carlos Alcaraz chuan 2014 champion Marin Cilic a hneh a, champion lai Daniil Medvedev a tla tawh bawk. US Open champion thar chauh ni loin, major title la thei mi thar an awm dawn tih a chiang ta.

Grand Slam title neih hnem lamah Nadal (22 titles) hian Novak Djokovic (21) kal fal san theihna remchang a nei a, mahse a hun ṭha neih a chhawr ṭangkai thei lo. Nomawi lian tham chawi hnem ber nih tuma inumna a la nung zel dawn.

Barakhaih
Grand Slam nomawi 22 a nei tawh a, an intawn hmasak pahnihah Nadal-a'n set a hloh miah lo bawk. US Open quarterfinal lut turin Tiafoe tan kawng a zim hle a, inkhelh hmain a player hmachhawn tur chu amah aia ṭha leh chungnung zawk a nih thu a sawi hial.

Mahse, Arthur Ashe Stadium-ah Tiafoe hian set a la hmasa zawk a, set hnihna hloh ve bawk mah se a hnuhnung panihah a chungnung zawk. Darkar thum leh minute 34 an inkhelh chhungin American tlangval hi a chak zawkah a ṭang.

Tiafoe chuan, "Kan intawn hnuhnung zawk khan 2019 a ni a, khami nena khaikhin chuan ka danglam ve tawh a ni. Tunah zet chuan Rafael Nadal ka hneh thei tih hi thu mai ni loin a tak a ni ta. Beisei phak baka ṭhain ka khel," tiin a sawi.

US Open bikah chuan 2005 khan Nadal hi American player tho James Blake lakah a chak lo, hemi kum pawh hian tun ṭum ang bawk hian seeded pahnihna a ni. Blake hnuah chuan Tiafoe hi American player zinga New York khawpuia Nadal hneh leh thei hmasa ber a ni hial.

Hma hun hre lo
A chak loh hnuah Nadal hma hun an zawt. Spanish star chuan, "Thil chinfel ngai ka nei, engtik hunah nge ka lo kir leh dawn ka hre lo. Taksa leh rilru a inpeih a ngai a, midang elphak tur leh inkhel tura ka inepeih takzet hunah ka lo kir leh ang," a ti.

Nadal hi a nupui Maria Francisca Perello a rai mek a, tun hnaiah hliam vangin a buai ngun hle bawk. Wimbledon semifinal pawh lut mah se a inkhel thei lo hial a, chhungkaw lamin a rilru a pawt buai bawk - tunah chuan hahchawlh a duh tih a hriat.

September 23-25 chhung hian Laver Cup khelh a ni dawn, inelnaah hian Nadal hi Roger Federer, Novak Djokovic leh Andy Murray te nen inlan ho tura tih an ni. Season tawpa khelh tur ATP Finals atan a tling bawk, mahse a inlan dawn em tih a chiang ta lo.

Kum 36 mi Nadal chuan, "Tennis khel tur chuan thaza tak nih a ngai, chet ran a ngai hle bawk. A nihna takah chuan chutiang chu ka ni rih lo," tiin a sawi a, inkhelh la chawlhsan rih lo mah se tournament a khel tlem tawh dawn tih chu a chiang.

Cilic hnehtu Alcaraz
Carlos Alcaraz hi kum 19 mi chauh a la ni a, tennis khel turin a puitling tawk tawh. Season hmasa khan US Open quartefinal lut thei naupang ber record a siam a, kuminah chuan champion thei naupang nih a tum mek - Cilic chu 6-4, 3-6, 6-4, 4-6, 6-3 a hnehin quarterfinal a lut.

Player la dam zingah seeded pahnihna Alcaraz hi ranking sang ber a ni tawh a, quarterfinal-ah chuan Jannik Sinner nen an inhmachhawn leh ang - nomawi chawi tur chuan match hautak pathuma chak a la hmabak a ni.

Inkhel dangah Sinner chuan Ilya Ivashka a hneh hram. Seeded 11-na hian player langsar vak lo Ivashka hi 6-1, 5-7, 6-2, 4-6, 6-3 in a hneh a, season kal laiah Australian Open leh Wimbledon quarterfinal a lut thei a, French Open-ah khan last 16 a thleng bawk.

Quarterfinal thlirlawkin Alcaraz chuan, "Jannik hi player huaisen leh theihna sang tak nei a ni a, ani paltlang tur chuan ka thawhrim a ngai khawp ang. Inkhel hautak tak hmachawn turin ka inpeih a ngai," a ti.