Inter khelmualah Bayern Barcelona inlan zan
Champions League khelh hun a thleng a, inkhel hmuhnawm tak tak en tur a awm nghal nual - zanin dar 12:30 hian European club lian pahnih an intawng dawn a, Inter Milan chuan Bayern Munich an mikhual dawn.
Team pahnih awmna group C-ah hian Barcelona an awm ve tih hriat a ṭha a, group khat aṭanga team pahnih chauhin knockout round an khelh dawn avangin club lian pathum tan match hmasa bera chak loh nghal a pawi thui thei dawn.
Barcelona hi zanin dar 12:30-ah vek an inlan dawn a, Catalan club-in an mikhual tur hi group C-a team nem bera ngaih Viktoria Plzen an ni a, Xavi hote tan tlawm a thiang lo.
Inter tan beiseina
Rei tak an reh hnuah Inter Milan-in 2020-21 season khan Serie A nomawi an chawi a, mahse, coach Antonio Conte-a'n a chhuahsan nghal - Simone Inzaghi enkawlna hnuaiah season hmasa khan pahnihna an ni a, tun season-ah erawh league match nga an khelh aṭanga point kua chiah hmuin table-ah pariatna an ni mek.
Inter hi Milan derby-a 3-0 ngawta AC Milan ngam lo hlim an ni bawk a, insiamṭhat an ngai tih an hai lo - mahse, chhuanlam tur tingin Chelsea aṭanga an lak let Romelu Lukaku chu hliam vangin a chawl mek.
Hriat tel atana ṭha erawh Italian club hian tawnhriat nei ṭha Edin Džeko leh match ngaa goal thum khung tawh Lautaro Martínez te an nei a, Bayern tlarhnung tana harsatna thlen turin an ṭha tawk.
Hei le Bayern
Robert Lewandowski chân mah se Bayern-in Sadio Mane an nei a, an thlamuanpui hman viau. Mahse, German champion hian an league match hmasa pathumah goal 15 zet an khung hnuin, an match hnuhnung pahnihah goal hnih chiah an khung a, draw result-ah lungawi an zir.
An vawk lal len ṭhinna Bundesliga-ah pawh pathumna an ni mek a, Bayern ang club tan league season an ṭan dan hi uanpui chi a ni lo - zaninah insiamṭhat an mamawh a, Inter lakah kher insiamṭhat erawh a harsa mai thei.
Tlarhmaah match sarih aṭanga goal nga khung tawh Sadio Mané chu innghahna tur a ni leh dawn a, match ruk aṭanga goal nga khungtu Jamal Musiala pawh hi hmuhnawm leh viau tura ngaih a ni - a chak lo zawk tan Barca an la awm ve miau avangin last 16 luh a harsa dawn.
Barca chak a ngai
Nipui transfer-ah Barcelona an che na a, an president Joan Laporta hoin 'risk' an la - mahse, leiba ngah club hian thutlukna an la siam sual rih lo niin a lang a, league match li an khelh tawhah tlawm la nei loin, goal 11 an khung tawh a, an lamah goal khat chiah a lut.
Catalan club hian match lia goal nga khung tawh Lewandowski leh Raphinha hmangin goal hmaa buaina an chingfel a, Ousmane Dembélé, Ansu Fati leh Ferran Torres an la nei cheu bawk - Czech champion Viktoria Plzen tan beiseina neih a harsa.
Barca hian tlarhnungah Ronald Araújo, Andreas Christensen, Eric Garcia leh Jules Koundé te ho an nei bawk a, league match ruk an khelha tlawm la nei lo ni mah se Viktoria Plzen tan Barca leh Czech First League lama an team tawn chu an danglam ang.