Son tan goal khung a ngai

Son Heung-min chuan Tottenham forward thar Richarlison chu a elpui a ni hran lo tih a sawi a, chutih rualin South Korean international hian beisei anga a khel chhuak lo reng a nih chuan inkhel bul ṭan reng a harsa mai thei.

Tottenham tan Son-a'n inelna hrang hrangah match 331 aṭangin goal 131 a khung tawh. Season hmasa phei kha chuan Premier League goal khung hnem ber a ni hial, penalty a la tel miah lo lehnghal.

Mahse, tun season chu Son a la che fuh hleithei lo, goal khung theihna remchang a neih pawhin a hlah leh ṭhin. Everton aṭanga an lak Richarlison chu bul ṭantu ni lo mah se, bench aṭanga a luh chinah a khel ṭha viau ṭhin thung.

Antonio Conte-a'n tlarhmaah player pathum a dah ṭhin a, striker Harry Kane chu khawih chet thiang lo a ni. Son leh Richarlison an khel kawp thei tih kan hmu tawh a, anni pahnih bakah hian Dejan Kulusevski an la nei bawk.

Son, Richarlison leh Kulusevski te hi an lut rual vek ngai lo, a tu emaw chu an awl a ngai. Premier League an khelh tawh chinah chuan Son hi thlan hmasak a la ni zel, tlan hmasak ni reng tur erawh chuan a elpui pahnihte aia a tih ṭhat a ngai.

Spurs hian zanin dar 12:30 hian Champions League group match an khel dawn. London khawpuiah Marseille an mikhual ang. Ligue 1 club hian an player ṭha Dimitri Payet an chawr thei dawn em tih a la chiang lo, a inlan lo a nih chuan an tlarhma a bil deuh ang.