Champions League lamah Reds-in mit an len
Premier League-a beisei phak lo Liverpool-in zaninah European football season an ṭan dawn a, zan dar 12:30-ah Champions League group stage match khel turin Napoli an lenchilh ang.
Hliamin a tihbuai Liverpool hian tun season-ah fan-te beisei an la phak lo takzet a, Community Shield nen season bul ṭan mah se league match ruk aṭangin point kua chiah an la nei - insiamṭhat an mamawh takzet.
Mahse, zanina an hmachhawn tur hi Napoli 'kher' an ni a, Serie A club hian league match nga an khelh tawhah tlawm an la nei lo - zaninah Liverpool lakah chak an duh ang tih a chiang a, Jurgen Klopp leh a naute tan chetsual theih a ni.
Liverpool tan lawmna
Klopp-a nauten zanina match pawimawh an khelh hmain chanchin lawmawm hriat tur an nei a, tun season-a an match hmasa bera inhliam Thiago Alcantara chuan club training a zawm leh tawh a, Arthur Melo an nei thar ta bawk - midfield-a talbuai tak Liverpool-in an buaina chinfelna tur an nei ta angin a sawi theih.
Reds tan Darwin Nunez-a'n Everton lakah goal khung lo mah se striker hriam tak a ni tih erawh hmuh turin a awm a, Diogo Jota a dam chian tawh bawk avangin Liverpool goal nawr a na sawt dawn.
Everton laka bench aṭanga luhtir Joel Matip pawh 100% a ni chho tawh niin a lang a, tlarhnung laiah Virgil van Dijk nen an inkawp thei a nih ngat chuan Liverpool tlarhnung paltlang a harsa leh sawt ang.
Napoli an buai
Hliam vanga talbuai Liverpool-in ngai an awh chho ṭan a, hetihlai hian Napoli erawhin chanchin lawmawm lo hriat tur an nei a, an striker chhuanvawr Victor Osimhen chu hliam vangin a inlan theih a rinawm loh.
Osimhen tel loin Napoli tlarhma a bil sawt ang tih a chiang a, chutihrual chuan Khvicha Kvaratskhelia hi en kan ngawt theih a ni lo - Georgian striker hian tun season-ah match nga khelin goal li a khung a, assist vawi khat a nei tawh.
Mexican winger Hirving Lozano leh midfielder Piotr Zielinski te pawh inkhel thlak danglam thei khawpa player ṭha an ni a, tlarhnung laiah Fenerbahce aṭanga an lakluh Kim Min-jae leh Kosovo centre back Amir Rrahmani te an khawng viau a, Mohamed Salah leh a ṭhianten awlsam taka hnathawk tura an inngai a nih chuan an tisual ang.
Thawnthu hlui
Napoli-in season hnih zet Champions League an khel lo tawh a, an khelh hnuhnung ber 2019-20 season khan Liverpool nen group khatah an awm ho tawh - Napoli hian an mualah 2-0 in hnehna an chang a, Anfield-ah 1-1 in Reds an inhnehtawkpui bawk.
Chutihrual chuan hetihlaia Napoli tana goal khungtu Dries Mertens (2 goals) leh Fernando Llorente te chu Italian club-ah hian an awm tawh lo. 2018-19 season pawh khan team pahnih hi group khatah tho an awm a, 1-0 in mahni mualah ve ve an chak!
Liverpool-in European football-ah sulhnu nei ṭha zawk mah se, club pahnih intawn tawhna thlirin Napoli an zam bik lo ang tih a chiang a, mahni mualah ngat phei chuan an intawn hnuhnung pahnihah an chak ve ve avangin an inringtawk khawp ang - inkhel hmuhnawm a beisei ngam e.
Rangers tan fiahna
Group A inkhel dangah kum 12 hnua a vawi khat nan Rangers-in Champions League match an khel dawn a, zanin dar 10:15-ah Ajax an lenchilh ang - mahse, European football-a match pawimawh an khelh hma chiahin Rangers-in chanchin lawmawm lo an nei.
Giovanni van Bronckhorst enkawl Rangers hian kar hmasa Inrinni khan Old Firm derby-ah an hmelma kumhlun Celtic chu 4-0 ngawtin an ngam lo a, Celtic ngam loh hi an tan a na vawng vawng - fans rilru na thawi dam nan zaninah chak an mamawh.
Ajax-in Manchester United lakah manager Erik ten Hag, player pahnih Antony leh Lisandro Martinez an chân a, goal khung khawl Sebastien Haller-a'n a chhuahsan bawk - mahse, he team hi tun season-a league match nga an khelhah an chak vek a, Rangers tan khualmuala ngam an harsa ang.
Zanin Inkhel Tur
Group A
Ajax 10:15 PM Rangers
Napoli 12:30 AM Liverpool
Group B
Atletico Madrid 12:30 AM Porto
Club Brugge 12:30 AM Bayer Leverkusen
Group C
Barcelona 12:30 AM Viktoria Plzen
Inter Milan 12:30 AM Bayern Munich
Group D
Eintracht Frankfurt 10:15 PM Sporting Lisbon
Tottenham Hotspur 12:30 AM Marseille