MPL9 - 1 Day to Go

Zote Honda Mizoram Premier League Season 9 ṭan nan ni khat chauh a awm tawh a, Mizoram chhunga football inelna sang ber hi Covid-19 vanga kum hnih chhung neih a nih tawh loh avangin tun ṭum inelna hi a hlu zual dawn.

MPL club pariat inthurual chuan lungrual takin tun season-ah state pawn leh foreign player la lo turin inremna an ziak a, foreign player an an awm dawn loh avangin team tin an intluk tawk sawt dawn.

I Day Football neih zawh takah Mizoram Police an champion a, an player neih dan enin MPL9-ah pawh champion rinkai an ni pha. Amaherawhchu, MPL danah hian Under 18 player a khelh reng a ṭul avangin I Day Football aiin MPL-ah Police hi an nem zawk turah a ngaih theih ang.

MPL-a record nei ṭha ber chu Aizawl FC an ni a, I League club hi vawi li an champion tawh. Tun ṭumah pawh hian AFC hi ṭha viau mah se ṭum danga an danglamna ṭhin foreigner an kawl dawn loh avangin nomawi humhim a harsa sawt ang.

Police leh Aizawl FC elpha ber tura ngaih chu Chanmari FC leh Chhinga Veng te an ni a, I Day Football aiin Chanmarians leh Chhingcows hi an ṭha tawh zawk.

Team dang pali FC Bethlehem, Chawnpui FC, Electric Veng FC leh FC Venghnuai te dah hniam a rem chuang lo. MPL9 hi MPL awm tawha team intluktlan ber ṭum a ni dawn a, inbuatsaihna a ṭhat tlan avangin round tir lamah chuan awlsam taka point thum hmuh theihna a awm meuh lo ang.