Fiahna paltlangtu Swiatek

Iga Swiatek chuan player hriat hlawh tak ni lem lo Jule Niemeier lakah fiahna hautak a hmachhawn a, Thawhṭan zan US Open inkhelah world number 1 hian set hmasa ber a hloh hnuah 2-6, 6-4, 6-1 in a tho chhuak.

Kum 21 mi Swiatek hian season duhawm a hmang mek, seeded pawh chang phak lo Niemeier hian a tir lamah chai thei viau mah se a rei hnuah erawh player ṭha zawk a nihna a lang a, set hnuhnung berah phei chuan game khat chiah a hloh.

French Open champion lai hian tualchhung nula Jessica Pegula a hmachhawn leh dawn, season kal laiah nomawi paruk ngawt a chawi tawh avangin US Open title pawh a lak theih a rinawm, chutih rualin New York-ah hian quarterfinal a luh vawi khatna chauh a ni.

Polish nula Swiatek chuan, "Beidawng loa ka beih theih avangin ka lawm, a tir lamah kha chuan ka talbuai ve hle a ni," a ti a, a beisei phak baka ṭantu a ngah chuan a tih lawm thu a sawi tel bawk.

Inkhel dangah American player Jessica Pegula hian seeded 21-na Petra Kvitova chu 6-3, 6-2 in a lo hneh ve thung a, inelna neih laiah player khel ṭha leh hmunawm zinga mi a nih avangin Swiatek nen an inkhel tur hi a hmuhnawm khawp ang.

Last 16 inkhel dangah Karolina Pliskova chuan US Open final vawi thum khel tawh Victoria Azarenka a hneh. A zawna last 16 paltlang tur hian Belarusian player lakah 7-5, 6-7 (5-7), 6-2 in hnehna a chang, ani hian Aryna Sabalenka a hmachhawn leh dawn a ni.