Fury-a'n Joshua a cho

WBC heavyweight champion Tyson Fury chuan Anthony Joshua chu kumin chhunga inhnekpuiah a cho a, boxer pahnih hi an inhmachhawn thei a nih ngat chuan boxing khawvela inhnek ngaihven hlawh ber pawl a ni ngei ang.

Anthony Joshua hian thla hmasa lawk khan, a vawi hnih nan Ukrainian boxer Oleksandr Usyk a ngam lo a, Saudi Arabia-a inhnekah hian WBO, WBA leh IBF title a lo hloh tawh chu a nei let thei lo.

Vawi 20 inhnek a hmachhawna vawi 20 chak thei Usyk hian Fury cho zui mah se, thlatir khan kumin chhunga inhnek lehnghal thei a nih loh thu a sawi a, a taksa enkawl a mamawh thu a sawi.

Mahse, April thlaa a chawlh thu puangtu, ring chhunga kir leh tum mek Fury-a'n kuminah inhnek hmachhawn ngei a duh a, Usyk a hman loh avangin Joshua hi lo hmachhawn phawt a duh niin a lang.

Kum 34 mi Fury chuan, "Fight ka hmachhawn leh thuai dawn tih inhre vek a, ka khingpui tur ka puan hmain chance a awm takin hei hi ka sawi duh. Anthony Joshua, Usyk lakah i tlawm tih ka hria a, belt hren lai i nei lo tih pawh ka hria.

"Chuvang chuan WBC heavyweight champion nih theihna leh lineal champion nih theihna chance pek che ka duh. Round 12 inhnek zo hlim i nih avangin i in fit tawk tih ka hria a, inbuatsaihna hun ka pek che avangin i inpeih hman a ni," a ti.

Fury chuan sawi chhunzawmin, "Ka chona hi i pawm a nih chuan kan inhnek theih hun tur ka rawn thawn ang che ang a, kan intawng thei ang - Britain tlangval pahnih, WBC heavyweight world champion ni turin kan inel dawn a ni," a ti a, a sawi ropui thiam hle.

Vawi 33 inhnek a hmachhawna vawi 32 chak tawh Fury hian April khan Dillian Whyte a hneh a, inhnek a chawlhsan thu a puang a, thla hmasa khan a sawi nawn leh bawk.

Mahse, kar hmasa Inrinni khan a khingpui tur chu tun kara a puan tur thu hi a sawi a, Usyk a nih loh tur thu erawh a lo sawi chiang tawh - Joshua hian Fury chona hi a pawm dawn nge dawn lo, he thu buatsaih a nih lai hian hriat a la ni lo.